نیشنل پارٹی خضدار اختلاف آتا گواچی،ضلعی کابینہ و کیہی سینئر باسک آتا استیفہ

خضدار (آن لائن) نیشنل پارٹی خضدار اختلاف آتا گواچی‘ ضلعی کابینہ، تحصیل کابینہ، بھاز آ عہدیدار، یونٹ سیکرٹریک‘ مسکوہی عہدیدار‘ کونسلر و درزن ناکچ کارندہ غاک پارٹی نا بنداوی رکنیت آن استیفہ تننگ نا پڑو کریر، پارٹی ءِ خضدار اٹ واپاری نا وڑ اٹ چلیفنگ انگ ءِ‘ مخلص آ کارندہ غاتے اولیت تننگپک‘ فیصلہ غاک ادارہ غاتا جاگہ غا بیٹھک آتے ٹی مننگ ءُ‘ بنجائی سرکڑدہ غاتے تینا گڑتی تیان معلومدار کرین ولے ننا توار ءِ کس بنتو‘ بنجائی سرکڑدہ غاک خاص آ بندغ آتے آئینی خلاف ورزی آ توننگ نا جاگہ غا اوفتا است بڈی ءِ کننگ اٹی ءُ‘دا حالیت آتے ٹی پارٹی تون چلینگ انگ مشکل مسنے ہندا سوب آن نن برانز کرسا نیشنل پارٹی نا عہدہ‘ بنداوی رکنیت آن استیفہ تننگ اٹی اُن۔ دا خیال آتا درشانی ءِ نیشنل پارٹی ضلع خضدار نا پریس سیکرٹری سیف اللہ ملازئی، ضلعی ڈپٹی جنرل سیکرٹری کاکا عبدالحمید بلوچ، ضلعی یوتھ سیکرٹری منیراحمد بلوچ، ضلعی لیبر سیکرٹری ماما رحمت اللہ کرد، تحصیل جنرل سیکرٹری محمد اکرم لہڑی، تحصیل پریس سیکرٹری بابو ثناءاللہ ساسولی، تحصیل فنانس سیکرٹری محمد اصفر گزگی تینا سَے سَد سنگت آتون اوار خضدار پریس کلب اٹ پریس کانفرنس آن تران کرسا کریر۔