کرونا وائرس‘ پاکستان اٹ 193 آن زیات ناجوڑ‘ عمران خان نا وام تے بشخنگ نا خواست

اسلام آباد/ امریکہ (مانیٹرنگ ڈیسک) پاکستان کرونا وائرس آن کل آن زیات زہمی آ صوبہ سندھ اٹ کووڈ-19 نا پوسکن ءُ ناجوڑ مون آ بننگ آن پد تدوک آ دے زہمی تا کچ 155 اسکان سر مسنے۔ وخت اس کہ پنجاب اٹ ہم پنچ پوسکنو ناجوڑ پک مسنو وخت اس کہ پنجاب اٹ کل ناجوڑ آک دا وخت اسکان 6 مسنو۔

ایلو کنڈآ پاکستان نا وزیر اعظم عمران خان پارینے کہ کرونا وائرس نا تالانی نا حالیت اٹ پاکستان تون نئے اوڑتون مون تننگ نا لائخی ارے او نئے دا کاریم کن وسیلہ ساڑی ءِ۔

امریکی جریدے بلومبرگ ءِ تروک ءُ انٹرویو سے ٹی پاکستان نا وزیراعظم پارینے کہ کرونا غریب ملک آتے بھس کیک۔ مستی عمران خان پارینے ’ کہ اگہ وائرس تالان مس تو ننے کل ءِ جانجوڑی نا بابت گڑاتا کاختی دوئی مریک۔ ننتون داڑتون مون تننگ کن نہ لائخی ارے او نہ وسیلہ ارے۔ عمران خان نا رداٹ پاکستان نا ‘جانجوڑی نا بابت آسراتی تے کروناوائرس تون مقابلہ کننگ کن کم ءُدا بیرہ پاکستان کن آخا کنا خیال اٹ انڈیا، خطہ نا ایلو ملک آتے ٹی ہندا حالیت مریک۔ ‘

اوفک جہانی برادری آن خواست کرینے کہ دا حالیت نا سوب آن شوندار آ ملک آتا قرض آتے معف کننگ نا بابت گام گیج آتے کن سفجنگے۔ عمران خان پارینے کہ ’معیشت آ تموک آ اثر تے آن کل آن زیات خلیس غریبی و بینگنی نا ءِ۔ دا حالیت آتے مون آ تخسا کنا خیال اٹ جہانی برادری ءِ ننے آمبار ملک آتا قرض آتے معاف کننگ نا بابت سفجنگے۔  ہرافک داڑان بھاز زہمی ءُ، دا ننے کم از کم اوڑتون مون تننگ کن کمک ایترہ۔’

او ایران نا خاص ذکر ءِ کرسا پارینے کہ  ‘ای ایران اٹ ہراوڑ مننگ اٹی ءِ اوفتے آن خلینگ اٹی اُٹ انتئے کہ ایران آ خلوک پابندیک اودے مالو آن غریب کرینو وخت اسکہ دا وائرس ہم اوڑے بس ۔’

اونا رداٹ دا اسہ جوانءُ مثال اس مرےتانکہ ایران آ خلوک آ پابندی تے اینک کننگے انتئے کہ او جاگہ نا اُلس کیہی ویل آتا گواچی ءِ، اوڑے حالیت آک پین وڑ اٹی ءُ۔

عمران خان نا دا بیان ہندن ءُ وخت اس مون آ بس ہراڑے پاکستان اٹ تدوک آ 24 گھنٹہ ٹی کرونا وائرس نا ناجوڑ آتا کچ اٹ مسہ کچ پین ودکی مسنے۔

قومی ادارہ برائے جانجوڑی نا کنڈ آن تروک آ کچ انا رداٹ ملک اٹ تدوک آ دے بیرہ833 بندغ نا کروناوائرس ٹیسٹ کننگانے۔