ڈٹ آتیا وخت آ عملدرآمد ءِ پک کننگ کن منظوری نا عمل ءِ ترند کننگے،سینیٹر محمد اورنگزیب

بنکاک، بنجائی وزیرِ خزانہ و بنگکاری سینیٹر محمد اورنگزیب پاکستان اٹی ایم 6 موٹروے ڈٹ انا مالی کمک، ایم ایل ون ریلوائی نا پوسکنوڑی و بجلی نا ترسیل بنداوی پنجر نا گچینی کن جہانی کمکاری ءِ ودفنگ آزور شاغسا پارینے کہ ڈٹ آتیا وخت آ عملدرآمد ءِ پک جوڑ کننگ کن منظور ی تا عمل ءِ ترند کننگ و تعلقدار ادارہ غاتا نیام اٹی رابطہ کاری ءِ سوگو کننگ المی ءِ۔ وزیرِ خزانہ دا ہیت ءِ تھائی لینڈ نا دارالحکومت بنکاک اٹی جہانی بینک گروپ و جہانی مالیاتی فنڈ (آئی ایم ایف) نا سالانہ دیوان آتا وخت آ اوپیک فنڈ جہانی شونداری نا صدر ڈاکٹر عبدالحمید الخلیفہ تون اوڑدہی ٹی پارے، اوڑدہی ٹی پاکستان نا اہم شونداری ڈٹ آتے کن مالی کمک، بنداوی پنجر نا اولیت و ہڑتوم آ کنڈآتا کمکاری نا مون آ دننگ نا بابت باندات آتیا گپ وتران کننگا۔ اوڑدہی نا وخت آ وزیرِ خزانہ پاکستان اٹی زرگوری سوگوی، آئی ایم ایف پروگرام نا رداٹ مروک آ پیشرفت و جہانی کیپٹل مارکیٹ اسکان ملک انا دُوارہ رسینگ ءِ تالان کرے۔ او پاکستان اٹی واپاری و ڈٹ مالی کمک ءِ ودفنگ کن اوپیک فنڈ انا آمادگی نا ستاءِ کرسا دا کمکاری ءِ شونداری اولیت آتا پورو ی کن اہم گوندا۔ فریق آک ایم 6 موٹروے ڈٹ انا مالی کمک آ سرجمی اٹ گپ وتران کریر، ہراٹی ڈٹ اکن منظور مروک اولیکو قسط، وام انا معاہدہ غا پیشرفت و بروک آ قسط آتا بابت باندات آتا جاچ ءِ ہلنگا۔ دا وخت آ ڈٹ انا مالی کمک نا ریسہ غاتے مونی دننگ و داڑا وخت آعملدرآمد ءِ پک کننگ کن المی گام گیج آتا اہمیت آ ہم گپ وتران مس۔ اوڑدہی ٹی ایم ایل ون ریلوائی ڈٹ انا پوسکنوڑی و بجلی نا سرکننگ بنداوی پنجر نا گچینی ءِ ہم پاکستان نا اہم اولیت آتیٹی اوار گوندنگا۔ ہڑتوم آ کنڈآن دا ہیت آ زور شاغنگا کہ تعلقدار ڈٹ آتیا پیشرفت ءِ ترند کننگ کن منظوری تا عمل اٹی ترندی اتنگے و ادارہ ئی کہول آگچین رابطہ کاری ءِ مونی دننگے تانکہ ڈٹ آتیا وخت آ عملدرآمد نا کسر اس جوڑ مرے۔ گپ وتران نا وخت آ ڈیہہ اٹی امن و سوگوی نا بابت باندات ا ٓہم شرہ مس۔ وزیرِ خزانہ اوپیک فنڈ انا صدر ڈاکٹر عبدالحمید الخلیفہ نا کنڈآن فنڈ انا دورہ نا سلہ غا اونا منت واری ءِ ہرفے۔ دا سلاہ ئی دورہ ٹی ایم 6 موٹروے ڈٹ انا بابت معاہدہ غا دستخط نا گمان تیاہم سجفنگ انگ ءِ۔