حکومت بلوچستان اسمارٹ لاک ڈاؤن ءِ 15 دے پین ودفے

کوئٹہ (آن لائن) حکومت بلوچستان صوبہ ٹی سمارٹ لاک ڈاؤن ءِ 15دے اکن ودفسا 30جولائی اسکان ودفے‘ ہرانا رد اٹ صوبہ نا غٹ شاری تیکن ماسک بیننگ ءِ المی گوندنگانے‘ حکومت بلوچستان نا محکمہ داخلہ نا نوٹیفکیشن نا رد اٹ مچ آ صوبہ ٹی غٹ شاپنگ مال‘ مارکیٹ‘ دکان‘ گودام‘ آٹو ریپئر شاپ و ہیر کٹنگ سیلون تے ہفتہ غان پنچ شنبے اسکان سہب انا 9 بجہ غان بیگہ نا 7 بجہ اسکان ملنگ نا موکل برجا سلک وخت اس کہ جمعہ نادے کل واپاری ہندجاٹ آک بند مریرہ، محکمہ داخلہ حکومت بلوچستان نا اعلامیہ نا رد اٹ دَہ یا دَہ آن زیات بندغ نا مچی‘ غٹ مذہبی‘سیاسی وایلو مچی‘ راجی مُری آن بیدس سفر کننگ و موٹرسائیکل نا ڈبل سواری، گاڈی ٹی 2بندغ آن زیات سواری تیا رکھ مریک وخت اس کہ ہر بندغ کن ماسک بیننگ یا پُچ اٹ مون ءِ ڈکنگ المی مریک‘ نوٹیفکیشن نا رد اٹ سیمینار ہال، فارم ہاؤس، پکنک پوائنٹ، میرج ہال، جیمز کلب، اسپورٹس کلب، پارک، ہوٹل،آڈیٹوریم، شوروم و بیوٹی پارلرآک بند مریرہ۔ نوٹیفکیشن نا ردا ٹ غٹ دکانک‘ واپاری ہندجاٹ‘ اسٹورک سہب انا 9بجہ غان بیگہ نا 7بجہ اسکان ہفتہ ٹی شش دے ملوک مریرہ وخت اس کہ جمعہ نادے پورو لاک ڈاؤن مریک۔ بیگہ نا 7 بجہ غان پد لاک ڈاؤن نا خلاف ورزی کروک آتا برخلاف کارروائی کننگک‘ وخت اس کہ تندور، ڈیری فارم، میڈیکل اسٹور، بلڈ بینک، کنوئی آ گڑاتا دکانک 24گھنٹہ ملوک مریرہ‘ وخت اس کہ بیکریک سہب انا 9بجہ غان ننکان 9بجہ اسکان ملوک مریرہ وخت اس کہ ہوٹل آک بیرہ پارسل نا وڑ اٹ اِرغ تننگ کیرہ۔ داکان بیدس انٹرسٹی و انٹراسٹی ٹرانسپورٹ ءِ ایس او پی تا رد اٹ چلیفنگ نا موکل مریک۔ نوٹیفکیشن نا رد اٹ محکمہ واسا، میونسپلٹی، کیسکو، پی ٹی اے، پی ٹی سی ایل، این ٹی سی، این ٹی ڈی سی، ایس ایس جی سی ایل، پی پی ایل، اوجی ڈی سی ایل و بی ایم ای نا ملازم آک مستثنیٰ مریک۔ نوٹیفکیشن اٹ پاننگانے کہ ہر بندغ ماسک بینک و سینیٹائزر خلیک‘ دکان تے ٹی بے ماسک آن کس ءِ ہم پترینگ نا موکل مفک، محکمہ داخلہ وقبائلی امور نا نوٹیفکیشن نا رد اٹ سمارٹ لاک ڈاؤن 30جولائی اسکان نافذ العمل مریک۔