شہید چیئرمین منظور بلوچ نا کزیت بلوچ قوم اکن المیہ سے آن کم اف‘ میرعطاء اللہ مینگل

نوشکے (تلار حوالکار)بلوچستان نیشنل پارٹی نوشکے ناکنڈآن ضلعی آفس نوشکے ٹی شہید چیئرمین منظور بلوچ‘ شہید گلزمین شہید حبیب جالب بلوچ‘ شہدائے بلوچستان نا یات اٹ ہڑزخواہی ریفرنس اڈ تننگا‘ ریفرنس اٹ غٹ شہید آتے خیسن ءُ سلام پیش کرسا خراج عقیدت پیش کننگا‘ ریفرنس نا بناءِ شہید آتا یات اٹ اسہ منٹ اسے نا چپی کرسا کننگا‘ ریفرنس آن تران کرسا بی این پی نا ضلعی صدر میر عطاء اللہ مینگل‘ سینٹرل کمیٹی نا باسک میر خورشیداحمد جمالدینی‘ بی ایس او نا سینٹرل کمیٹی نا باسک عتیق بلوچ‘ بی این پی نا نائب صدر نسیم بلوچ‘ مسکوہی ضلعی صدر نذیر بلوچ‘ مسکوہی جنرل سیکرٹر ی میر ثناء اللہ جمالدینی‘ حمید ریڈ بلوچ‘ زاہد مینگل‘ ضلعی جوائنٹ سیکرٹری میر صاحب خان مینگل‘ لیبر سیکرٹری عبدالکریم مینگل‘ بی ایس او نا ضلعی انفارمیشن سیکرٹری وقاص بلوچ وایلوفک شہید چیئرمین منظور بلوچ و شہید گلزمین حبیب جالب بلوچ و بلوچستان نا شہید آتے خراج عقیدت پیش کرسا پاریرکہ شہید آک تینا جان تے ندر کرسا وطن وقوم انا سربلندی نا تحریک ءِ سوگو کریر و اینو نا ہڑزخواہی ریفرنس نا وخت آ  بلوچستان ناالس خاص وڑ اٹ ورنا چین ءِ دا عہد کروئی ءِ کہ ننے شہید آتا مشن ءِ پورو کروئی ءِ۔ ترانکار آک پاریر کہ شہید چیئرمین منظور بلوچ نا اناگت کزیت بلوچ قوم اکن المیہ سے آن کم اف۔ شہید چیئرمین منظور بلوچ ہر محکوم و مظلوم نا توار ئس‘ او راج اٹ ہر وڑ انا بیدادی و بے انصافی تابرخلاف بش مرسا حق و راست انا توار ءِ چست کریکہ۔