سندھ حکومت نا بروک آ اِرا ہفتہ نا لاک ڈاﺅن ءِ پین سخت کننگ نا پڑو

کراچی : سندھ حکومت نا بروک آ اِرا ہفتہ نا لاک ڈاﺅن ءِ پین سخت کننگ نا پڑو‘ ، ڈبل سواری آ رکھ مر یک ولے نیاڑی تتون ڈبل سواری نا موکل مریک، 5 بجہ غان گڈ لاک ڈاﺅن اٹ پین سختی کننگک۔ کراچی ٹی پریس کانفرنس کرسا وزیراعلیٰ سندھ سید مراد علی شاہ پارے کہ لاک ڈاﺅن اٹ ہچ نرمی مفننگ ءِ بلکہ پین سخت کینہ تے‘ بے پیدوار مروک مرک آتے ہروئی تمک کہ نن غلط تو ہنپننگ اٹی ان‘ داسکان 100 مرک مسنو تو نیمہ گڑتی سے، ننا ٹیسٹنگ پازیٹو بننگ اٹی ءِ ہرا دنیا نا ایورج نا بریبر ءِ‘ ڈبلیو ایچ او پارینے کہ بیدس سندھ آن ٹیسٹنگ ایس او پی ایلو ہند آتیا فالو مفننگ ءِ‘ ننا 10 درسَد کیس بسنو‘ ای تینا گڑتی تا درشانی ءِ ہر فورم آ کرینٹ‘ داسہ ہم ای دا ہیت آباور کیوہ کہ اگہ نن لاک ڈاﺅن آ سختی کینہ تو دانا فائدہ کل ءِ مریک‘ اوپارے کہ کیہی ہندن ءُ بندغ اریر ہرافک کورونا غان زہمی ءُ ولے اوفتے سما اف‘15 شکبر ناجوڑ کورونا سسپیکٹ ئسر‘ دا حساب اٹ سندھ اٹ 55 کورونا غان زوال کرینو‘ دَرو بنجائی حکومت تون ہیت مسوسس ہمو وخت آ مرک آک 93 ئسر ہرااومیت آن کم ئسر‘ چاہندار آک پارینو کہ مرک آک 190 یا 200 مسر تو گڑتی نا ہیت اسے‘ بھاز آ مرک آک رپورٹ متنو‘ وزیراعلیٰ سندھ پارے کہ الس نن تون کمک کے ای تینٹ ایس اوپی تیا عمل کیوہ‘ بیدس نیاڑی تیان ڈبل سواری نا موکل اف‘ موٹر سائیکل آ مسہ چار چناتا موکل مفک‘ نیک نیتی اٹ کاریم کننگ اٹی ان‘ کس ءِ لاک ڈاﺅن ءِ پرغنگ و الس نا جان تتون گوازی کننگ کن الیپنہ‘عالم دین تیان کمک ہلینہ‘ سندھ انا بندغ آک کورونا نا برخلاف کمک کریر و حکومت تون تفینو‘ او پارے کہ سندھ حکومت نا ہرا 12 ارب روپئی ناخڑچ انا ہیت آک مننگ اٹی ءُ او چندی گام گیج آتیکن ءُ‘ کورونا نا فنڈ انا چاروکی ءِ اسہ کمیٹی اس کننگ اٹی ءِ۔ سندھ اٹ دو نیم لکھ غریب بندغ آتے راشن فراوان کننگانے‘ ہرافتا ریکارڈ ارے، اللہ نا کمک اٹ کورونا نادَین انا مون ءِ تورنہ۔ مراد علی شاہ پارے کہ ہرا واپاری ہندجاٹ آک ملنگرہ اوفتا ایس او پی مریک نن بنجائی حکومت ءِ پارین کہ نی ننے ایس او پی ایت تاکہ نن تینا ورندی ءِ تننگ کین‘ نن 4 پنہ نا چٹھی ورندی ٹی نوشتہ کرین‘ منہ صوبہ نا خیال ئس کہ پلمبر، الیکٹریشن، درزی، حجام تا دکانک ملنگر‘ نن پارین دا مشکل ءِ‘ بازارنا نیام اٹ منہ دکان امر ملنگ کینہ۔

(آن لائن)