جوہری و میزائل پروگرام آ سمجھوتہ کننگپک، اسحاق ڈار

اسلام آباد : وزیرخزانہ سینیٹر اسحاق ڈار پارینے کہ پاکستان نا جوہری و میزائل پروگرام آ ہچ ءُ سمجھوتہ اس مننگ کپک، نن پاکستان نا الس نا نمائندہ و قومی فائدہ غاتا رکھوک آک اُن، کس اسے دااختیار اف کہ او پاکستان نا میزائل پروگرام آ ڈکٹیشن ایتے، آئی ایم ایف تون معاہدہ مننگ تون ہی غٹ سرجم آتے وزارت خزانہ نا ویب سائٹ آ شاغنگک۔ پنچ شنبے نادے آ سینیٹ نا 50 سال انا دود آتا ارٹ میکو دے تینا تران اٹی وزیرخزانہ اسحاق ڈار درملکی سفارتکار آتے بخیر کرسا پارے کہ سینیٹ آف پاکستان نا بریبری، اجتماعیت، صوبائی وتواجہی و جوان پارلیمانی جمہوریت کن اسہ شاندار ءُ تاریخ اسے۔ سینیٹ اٹی کمیٹی تا جوان ءُ نظام اسے، نن جمہوری اصول آتے سوگو کننگ کن اجتماعی کڑد ادا کننگ اُن۔ ہرکانود داکان ہڑتوم آ ایوان تیان منظور مریک ہراٹی سینیٹ نا اہم ءُ کڑد اسے۔ سینیٹ اٹی مالیاتی بدل آ سلاہ تننگک۔ ای بطور وزیرخزانہ دا سلاہ و سوج آتے زیات آن زیات بجٹ نا بشخ جوڑ کرینٹ۔ اوپارے کہ نن دنیا نا جمہوریت آتیان ہیل کینہ۔ سفارتکار آتون گپ وتران کینہ۔ ننے آن ہر اسٹ نا آئینی و پارلیمانی زمواری ءِ۔ کنے یقین ءِ کہ نن غٹ اواری اٹ دا کرہ ارض آ جمہوریت و انسانی قدر ءِ گچین کننگ اٹ تینا کڑد ءِ ادا کننگ کینہ۔ ای بطور وزیرخزانہ مالیاتی نظم و نسق اٹی شفافیت کن پبی کوشست کرینٹ۔ شفاف مالیاتی ڈسپلن آن بیدس اسہ جمہوریت یا جمہوری نظام اس ہم سرسہب مننگ کپک۔ رضاربانی نا کنڈآن چست کروک آ گڑاس ٹک آتا ورندی ءِ ترسا وزیر خزانہ پارے کہ بطور وزیر خزانہ ای اولیکو وار یکم جنوری 1999 آ آئی ایم ایف تون مروک آ معاہدہ نا غٹ سرجم آتے ویب سائٹ آ شاغفیٹ۔ 1998 ٹی ہراتم ای وزیرخزانہ مسٹ ہموتم آئی ایم ایف پروگرام معطل ئس۔ ای قوم اتون دا قول کریسٹ کہ غٹ سرجم آتے ویب سائٹ آ شاغنگک و الس ءِ اوتسکان رسینگ مریک۔ شفاف لیول معاہدہ و ایم ای ایف ءِ گڈیکو دروشم اس تننگ انگ ءِ۔ دانا گڈیکو منظوری آن پد غٹ سرجم آتے وزارت خزانہ نا ویب سائٹ آ شاغنہ۔ نن شفافیت و مالیاتی ڈسپلن آ باور کینہ۔ ای 5 سال جلاوطنی کاٹاٹ انتئے کہ ہر گڑاآن ایڑترمرسا مالیاتی نظم و نسق نافذ کریسن۔ پاکستان نا نیو کلیئر و میزائل پروگرام آ اسہ بندغ اس ہم سمجھوتہ کننگ کپک۔ نن پاکستان نا زموار شاری اُن۔ نن پاکستان نا الس نا وقومی فائدہ غاتا رکھوک اُن۔ کس اسے دا اختیار اف کہ او پاکستان نا میزائل پروگرام آ ڈکٹیشن ایتے۔ کنا مون اٹی اسٹیٹ بینک نا وتواجہی نا ترمیم آن وتواجہ ما نیٹری پالیسی جوڑ کننگ اٹ کمک رسینگانے۔ اوپارے کہ آئی ایم ایف معاہدہ نا شڑت آتیا عملدرآمد نا خواہندار ءِ۔

(اے پی پی)