عمران خان کانود و عدالت آن دہشتگرد آتیانبار نرنگ ءِ، مریم اورنگزیب

اسلام آباد : بنجائی وزیر حوالکاری و شینکاری مریم اورنگزیب پارینے کہ عمران خان آئین، کانود و عدالت آن دہشت گرد آتیانبار نرنگ اٹی ءِ۔ پنچ شنبے نادے آ تینا ٹویٹ اٹی اوپارے کہ عمران خان لغور دہشت گرد والا کاریم ءِ کننگ ءِ، دُن کہ دہشت گرد آک پولیس آ جلہو کیرہ، چناو زالبول آتے اسپر جوڑ کیرہ،واوفتا خون آ بلیک میلنگ کیرہ۔ اوپارے کہ فارن ایجنٹ آئین، کانود و عدالت آن دہشت گرد آتیانبار نرنگ اٹی ءِ، دہشت گرد ریاست آ جلہو گیر ءِ۔ داکان بیدس بنجائی وزیر حوالکاری و شینکاری مریم اورنگزیب پارینے کہ عمران خان پاکستان نا تشخص ءِ لتاڑنگ اٹ لگوک ءِ، اونا دزگیری تون حکومت نا ہچ ءُ تعلق اس اف، نئے اونا دزگیری نا گچین کاری تیٹی تاخیر تون تعلق اس ارے۔ جہانی نشریاتی ادارہ ”سکائی نیوز“ تون گپ وتران کرسا بنجائی وزیر حوالکاری پارے کہ عمران خان کانود تون کمک کننگ نا جاگہ غا پدریسہ کانود شکنی کننگ اٹی ءِ، پولیس بیرہ عدالتی پرمان تیا عملدرآمد کننگ اٹی ءِ، اوڑا کرپشن نا مقدمہ غاک ءُ و اودے دزگیر کرسا عدالت اٹ پیش کننگ ءِ۔ اوپارے کہ پولیس تون ہچ وڑنا سلہہ اس اف، پولیس عدالتی پرمان تیا عملدرآمد کننگ کن زمان پارک اٹی ساڑی ءِ ہراڑے پولیس آ بمب آتے اٹ پدریسہ جلہو مننگ اٹی ءِ۔ داوخت اسکان ڈی آئی جی آپریشن لاہور تون اوار 65 پولیس کارندہ ٹھپی مسنو۔ اوپارے کہ عدالت نا کنڈآن جاری وارنٹ دزگیری آ پولیس سلہہ آن بیدس عمران خان ءِ دزگیر کننگ کن زمان پارک اٹی ساڑی ءِ، عمران خان زمواری آن کاریم ہلے۔ اوپارے کہ عمران خان پدریسہ دروغ تڑنگ اٹی ءِ، عمران خان پاہک کہ اودے سیکورٹی خطرہ ءِ، و ہند اوخت آ پاہک کہ او سیاسی جلسہ کننگ کن تیار ءِ، ہراتم عدالت اودے مقدمہ غاتیٹی پیش مننگ نا پاہک تو عمران خان سیکورٹی کطرہ غاتا بہانہ کیک۔ اوپارے کہ عمران خان پاکستان اٹی خانہ جنگی، سول وار و ہڑدڑ خواہک، او مخلوق ءِ بیدادی کن ہُشکا تننگ اٹی ءِ، پولیس ہراتم عمران خان ءِ دزگیر کننگ کن بریک تو او زالبول و چناتے پولیس نا مون آ سلفک۔ بنجائی وزیر حوالکاری پارے کہ پاکستان نا ساڑی آ خراب زرگزرانی حالیت آتا زموار عمران خان ءِ، عمران خان ملک ءِ ڈیفالٹ نا دنگ آ سرکرے۔ عمران خان مارچ 2022ء ٹی تینا ہی دستخط کروک آئی ایم ایف پروگرام نا خلاف ورزی ءِ کرے۔ اوپارے کہ عمران خان نا وارنٹ دزگیری اونا برخلاف کرپشن نا مقدمہ غاتیٹی جاری مسنے، عمران خان تینا چار سال اٹی تینا سیاسی مخالف آتیا دروغ انا مقدمہ جوڑ کرے، اوفتے زندان تیٹی شاغا، او ہراتم وزیراعظم ئسک تو تینا سیاسی مخالف آتا وارنٹ دزگیری ءِ تینٹ جاری کرفیکہ، او پاکستان نا تشخص ءِ لتاڑنگ اٹ لگوک ئسک، عمران خان وزارت عظمیٰ نا منصب آ تولسا میڈیا تون ہم ناروا سلوک کرے۔

(اے پی پی)