کس آئین و کانود آن ایڑتراف، ترمیم پارلیمنٹ نا واکداری ءِ، شیری رحمان

اسلام آباد : بنجائی وزیر موسمیاتی بدلی سینیٹر شیری رحمان پارینے کہ کس اس آئین و کانود آن ایڑتر اف، آئین اٹی ترمیم کننگ پارلیمنٹ نا اختیار ءِ، ننے احتساب، سیوت و گورننس اٹی گچینی کن عزم کننگ نا گرج ءِ۔ پنچ شنبے نادے آ سینیٹ نا 50 می سال دے انا وخت آ خصوصی دیوان آں تران کرسا اوپارے کہ ایوان اٹ ساڑی غٹ شخصیت آتے گولڈن جوبلی مبارک مرے، دا دود چیئرمین سینیٹ نا ستا کڑزوک ءُ گام اسے، دا دود جمہوری قدر انا بابت اہمیت تخک، سینیٹ بنجانا نشانی ءِ ہراٹی غٹ صوبائی اکائی تا نمائندگی اوار ءِ، پیپلزپارٹی دا آئین نا خالق ءِ، دا آئین مشکل حالیت آتیٹی ملکی سوگوی نا ضامن ئس، داٹی بریبری نا اصول آ عمل کننگانے۔ اوپارے کہ غٹ سیاسی اختلاف آتیان پد ہم پارلیمنٹ خاص وڑاٹ سینیٹ گچین کارکڑد نا درشانی ءِ کننگ ءِ، نن عملی گام گیج آتا کمک اٹ سیاسی قدر آ عمل کین، نن سینیٹ نا عزت وشرف اٹی ودکی کن گام گیج کین، آخبت اٹ پین گچینی بریک۔ سینیٹر شیری رحمان پارے کہ موسمیاتی بدلی جہانی ویل اسے، نن آئین نا شرف ءِ کینہ، اوٹی پاننگانے کہ گچین کاریک وخت آ مریر تو ہنداوڑہی مرے، کس اس ہم آئین و کانود آن ایڑتراف، کس اس عدلیہ و ادارہ غاتے شست کپ، آئین و کانود نا شرف ءِ کننگے۔ آئین اٹی ترمیم کننگ پارلیمنٹ نا اختیار ءِ۔ اوپارے کہ شہید بے نظیر بھٹو، آصف علی زرداری و فریال تالپور ءِ دزگیر کننگا، شہید بے نظیر بھٹو پارلیمنٹ نا مدام شرف ءِ کرے، ننے احتساب، سیوت و گورننس اٹی گچینی کن عزم کننگ نا گرج ءِ۔

(اے پی پی)