عمران خان زلمے خلیل زاد ءِ دوست ءِ تو دے تے، حافظ حمد اللہ

اسلام آباد : پاکستان ڈیموکریٹک موومنٹ نا ترجمان حافظ حمداللہ پارینے کہ اگہ زلمے خلیل زاد ءِ عمران خان دوست ءِ تو اودے تینے آ بٹنگے۔ سی آئی اے نا زرخرید غلام زلمے خلیل زاد ارٹمیکو غلام عمران خان نا حق اٹ ہیت کننگ اٹی ءِ۔ حافظ حمداللہ پارے کہ نم اودے ہالی ووڈ اٹ دیرے یا اولڈ ہوم اٹ‘ غلام ہم نماءِ‘ منشا ہم نما۔ مگہ زلمے خلیل زاد پاکستان الیکشن کمیشن نا چیف ءِ ہرا گچین کاری تا تاریخ تننگ اٹی ءِ؟۔ ترجمان پی ڈی ایم پارے کہ داڑان پک مس کہ عمران خان پاکستان نا آخا امریکہ نا ایجنٹ ءِ‘ وزارت خارجہ زلمے خلیل زاد ءِ شٹ اپ کال ایتے کہ ننا تہہ انا باندات آتے ٹی نیام تمپ۔ پولیس نا گاڈی تے خاخر تننگ و کارندہ غاتے ٹھپی کننگ دہشت گردی و ریاست آ جلہو اس اف؟ مگہ دا کل عدالتی پرمان آن بغاوت افس؟حافظ حمداللہ پارے کہ دا سیاسی دہشت گرد ءِ رعایت و وار وار آ ریلیف تننگ بے انصافی اسے۔ ریلی ناکماشی ءِ کننگ آ جان ءِ خطرہ اف ولے عدالت اٹ پیشی نا وخت آ جان ءِ خطرہ مریک؟ او پارے کہ گڑا عدالت عمران خان نا دا منافقت ءِ پُہہ مفننگ ءِ؟ دا دُرو‘ فراڈ عدالت آ ملنڈ اس اف؟ دا بندغ ہچ ءُ رعایت اسے نا حقدار اف۔ یات سلے کہ تدوک آ دے تینا ٹوئٹ اٹ زلمے خلیل زاد پاریسس کہ عمران خان نا دزگیری آن پاکستان نا سیاسی تنکی پین ودک‘ خرابی ءِ توننگ کن جون انا بنا ٹی قومی گچین کاری تیکن تاریخ اس پک کننگے۔

(آن لائن)