زلمے خلیل زاد چرت خلپ تینا تنکی تے ایسر کننگ کینہ، رضاربانی

اسلام آباد : مسکوہی چیئرمین سینیٹ میاں رضا ربانی پارینے کہ پاکستان نا سیاسی حالیت آتیا زلمے خلیل زاد نا بیان آ اودے کلہو تننگے کہ او تینا کاریم تون کاریم تخے، نن داقابل ارین کہ تینا تنکی تے ایسر کننگ کین، لاہور اٹی ودی مروک آ ساڑی آ حالیت کانود نا حکمرانی آن انکار نا مترادف ءِ، تحریک طالبان پاکستان تون گپ وتران، پاکستان اٹی مروک آ گڑاس آئینی ترمیم، ودکی آئی ایم ایف معاہدہ نا بابت پارلیمان ءِ بایدے پت اٹی ہلنگوسس۔ پنچ شنبے نادے آ سینیٹ آف پاکستان نا 3 دے ئی گولڈن جوبلی دود آتا ارٹ میکو دے تینا تران اٹی اودا دود آتا اڈتننگ آ چیئرمین و ٹیم ءِ مبارکبادی ترسا پارے کہ تدوک آ دے تیٹی صوبائی دارالحکومت لاہور نا حالیت کانود نا حکمرانی آن انکار نا مترادف ءِ۔ اوغانستان آ مسکوہی امریکی نمائندہ زلمے خلیل زاد تینا ساڑی آ بیان اٹی پاکستان ءِ سبخ خوانفنگ ءِ۔ پارلیمنٹ ءِ مرے کہ او اودے پائے کہ تینا کاریم تون کاریم تخے۔ نن دا قابل ارین کہ تینا تنکی تے ایسر کننگ کین۔ اوپارے کہ تحریک طالبان پاکستان تون گپ وتران آ پارلیمان ءِ بایدے پت اٹی ہلنگوسس۔ اینو پاکستان اٹی دہشت گردی ٹی ودکی مننگ ءِ ہرانا براہ راست تعلق خیبرپختونخوا نا بابت مستین اٹ اختیار کروک آ گڑاس پالیسی تیان ءِ۔ اوپارے کہ آئی ایم ایف معاہدہ نا بابت تاخیر گڑتی نا سوب ءِ، و دارداٹ چندی گڑتی تے ظاہر کننگ انگ ءِ ہرافتے بایدے مر کننگے۔

(اے پی پی)