وزیراعظم نا ءِ ڈاکٹر عافیہ نا بابت امریکی حکومت تون حالی حوالی نا پارت
Get real time updates directly on you device, subscribe now.
اسلام آباد : وزیراعظم محمد شہباز شریف وزارت خارجہ ءِ ڈاکٹر عافیہ نا خیریت و اونا زوت رہائی کن امریکی حکومت تون اوار اوار واشنگٹن اٹی پاکستانی مشن تون پورو وڑاٹ حالی حوالی مننگ نا پارت کرینے۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف تون ڈاکٹر عافیہ صدیقی نا ایڑھ ڈاکٹر فوزیہ صدیقی اوڑدہی کرے۔ اووزیراعظم نا منت واری ءِ ہرفسا حکومت نا کنڈآن ڈاکٹر عافیہ نا آسودہی کن کروک آ گام گیج آتا ستاءِ کرے و درخواست کرے کہ حکومت ڈاکٹر عافیہ نا زوت رہائی کن تینا کوشست آتے ودفے۔ وزیراعظم ڈاکٹر فوزیہ صدیقی ءِ حکومت پاکستان نا کنڈآن پورو کمکاری نا باوری کرفسا وزارت خارجہ ءِ ڈاکٹر عافیہ صدیقی نا خیریت و اونا زوت رہائی کن امریکی حکومت تون اوار اوار واشنگٹن اٹی پاکستانی مشن تون پورو وڑاٹ رابطہ ٹی مننگ نا پارت کرے۔ وزیراعظم ڈاکٹر عافیہ کن انصاف نا دوئی کننگ اٹ ڈاکٹر فوزیہ نا کیہی سال تیان خواری کوشست آتا ستاءِ کرے و ڈاکٹر عافیہ نا دراخ جوڑی کن دعا کرے۔ یات سلے کہ مسکوہی وزیراعظم محمد نواز شریف ہم ڈاکٹر عافیہ نا رہائی کن پبی کوشست کریسس۔
(اے پی پی)