کوئٹہ گلیڈی ایٹرز کراچی کنگز ءِ 5 وکٹ اٹ کٹا

کراچی (مانیٹرنگ ڈیسک) پی ایس ایل فائیو نا 30 میکو میچ اٹ کوئٹہ گلیڈی ایٹرز کراچی کنگز ءِ 5 وکٹ اٹ بے سہب کرینے۔ نیشنل اسٹیڈیم کراچی اٹی مروک آ پاکستان سپر لیگ نا 30 میکو میچ اٹ کراچی کنگز اولیکو بیٹنگ کرسا 20 اوور اٹ 150 رنز جوڑ کرے او کوئٹہ گلیڈی ایٹرز ءِ سرسہبی کن 151 نا ٹارگٹ تننگا۔ داکان مست کراچی کنگز نا کیپٹن بابراعظم ٹاس ءِ کٹنگ آن پد تینٹ بیٹنگ کننگ نا فیصلہ کرے۔ مالو نا اِرا میچ اٹ مین آف دی میچ نا ایوارڈ ءِ دوئی کروک آ شرجیل خان ءِ اولیکو اوور اٹ نسیم شاہ آوٹ کرے۔ مسٹمیکو نمبر آ بیٹنگ کن بروک آ افتخار احمد ہم 21 رنز جوڑ کننگ کرے۔ کیپٹن بابراعظم کیمرون ڈیلپورٹ تون ملسا ڈائی ءِ مچہ مونی دے ولے او تینٹ 32 رنز آ آوٹ مس۔ اوکان پد چاڈوک والٹن ڈیلپورٹ تون کمک کرے او ذمواری اٹ اسکور ءِ مونی درے۔ ڈیلپورٹ 37 بال آتیا ففٹی کرے۔ والٹن 20 بال آ 26 رنز جوڑ کننگ آن پد آوٹ مس وخت اس کہ ڈیلپورٹ 44 بال آ 62 رنز نا ڈائی اس گوازی کننگ آن پد آوٹ مس ہرافتے ٹی اِرا 6 و پنچ 4 اوار ئسر۔ کوئٹہ گلیڈی ایٹرز نا کنڈآن نسیم شاہ 2 وخت اس کہ فواد احمد، محمد حسنین و سہیل خان آسک اسہ اسہ وکٹ دوئی کرے۔ اوکان پد ایلو ڈائی ٹی کوئٹہ گلیڈی ایٹرز نا پنچ گوازی گر 16.2 اوور اٹ 154 رنز نا ٹارگٹ ءِ پورو کریر۔