چین انا آزموندہ غان ہیل کرسا کرونا وائرس آن بچنگ کن گام گیج کینہ، صدر علوی

اسلام آباد(اے پی پی) صدر مملکت ڈاکٹر عارف علوی پارینےکہ اونا دورہ چین نا مسخت کرونا وائرس نا رداٹ پاکستان نا کنڈآن چینی حکومت و الس تون یکجہتی نا درشانیءِ کننگ نا ءِ۔ دوشنبے نادے آ چین نا اِرادے ئی دورہ غا راہی مننگ آن مست صدر مملکت پارے کہ اودے دا دورہ نا سلہ ءِ اونا چین ہم منصب شی جن پنگ خلکنے۔ چین دا سخت انگا وخت اٹی پاکستان نا کنڈآن کمک و اوڑاکروک آ پت آ منت ءِہرفنگ خواہک۔ اوپارے کہ چین کرونا نا بھلو دَین اسے نا مقابلہ ءِ کرینے ہرانا نن ستاءِ کینہ۔ صدر مملکت پارے کہ نن ہم چین انا آزموندہ غان ہیل کرسا کرونا نا دَین آن بچنگ کن پین گام گیج کینہ۔ اوپارے کہ دادورہ ٹی او کرونا نا دَین آن چین اٹی مروک آ جانی نسخان آ چینی سرکڑدہ غاتون ہڑزخواہی نا ہم درشانیءِ کیک۔ داکان مست صدر مملکت ڈاکٹر عارف علوی چین نا 2دے ئی دورہ غا راہی مسنے۔ دوشنبے نادے آ ایوان صدر آن جاری بیان نا رداٹ صدر مملکت ڈاکٹر عارف علوی دا دورہ ءِ چین نا صدر شی جن پنگ نا سلہ غا کننگ ءِ۔ تینا دورہ ٹی صدر مملکت ڈاکٹر عارف علوی تینا ہم منصب شی جن پنگ و چینی سرکڑدہ غاتون اوڑدہی کیک۔ دورہ ءِ کننگ نا مسخت پاکستان نا کنڈآن کروناوائرس نا رداٹ چین نا حکومت و الس تون پورو کمک و یکجہتی نا درشانیءِکننگ نا ءِ۔ دورہ غان ہڑتوم آ برادر ملک آتا نیام اٹ تاریخی، تین پہ تینی پت و کمکاری آ مبنی تعلق ءِ پین سوگوی ملک۔