وزیراعظم نا کماشی ٹی کرونا وائرس نا بابت پیشگی رکھی گام گیج آتا بابت دیوان

سلام آباد ( آن لائن ) وزیراعظم عمران خان نا کماشی ٹی کرونا وائرس نا سوب آن ملکیاا  معیشت آ تموک آ اثر تےان بچفنگ نا بابت اٹ مالوی آن رکھوک ءُ گام گیج ہرفنگ نا بابت اٹ بڑزکو کہول نا دیوان اس اڈ تننگا۔ دیوان اٹ وزیر برائے اقتصادی امور حماد اظہر، وزیرِ برائے نیشنل فوڈ سیکیورٹی مخدوم خسرو بختیار، سلاہکار خزانہ ڈاکٹر عبدالحفیظ شیخ، سلاہکار واپاری عبدالرزاق داود، مشیر برائے اصلاحات ڈاکٹر عشرت حسین، خصوصی کمکار ڈاکٹر فردوس عاشق اعوان، بنجائی سیکرٹری صاحب آتون اوار ایلو سینئر افسرک ہم اوار ئسر۔ دیوان اٹ کرونا وائرس نا سوب آن جہانی کہول آ جہانی معیشت آ تموک آ اثرک و اوفتا نتیجہ ٹی ملکی معیشت نا حالیت آ جوانی وڑ اٹ ہیت وگپ کننگا۔ کرونا وائرس نا بابت اٹ ملکی معیشت آ ہڑدے نا بنداو آ نظر شاغنگ و مستی نا گام گیج آتا سجفنگ کن سلاہکار خزانہ نا کماشی ٹی بین الوزارتی کمیٹی اس جوڑ کننگا۔ وزیرِ اعظم دیوان آن تران کرسا پارینے کہ کرونا وائرس نا منفی اثر تیان ملکی معیشت ءِ کچ اسکان رکھنگ، زرگزرانی کاریم تا روانی ءِ پک کننگ و خاص کر عام انگا اُلس کن روزگار نا رکھ ءِ پک کننگ ءِ اولیت ایتنہ۔