فیول ریلیف اسکیم آن موٹرسائیکل آتے 5، 800 سی سی گاڈی تے 10 لیٹر نا ریلیف ملک، عطاء تارڑ

اسلام آباد، بنجائی وزیرک پارینو کہ جہانی کہول آ پیٹرولیم تنکی نا زہم تیان نزور و حقدار تپہ غاتے بچفنگ کن بنا کروک وزیراعظم فیول ریلیف اسکیم آ عملدرآمد نا بناءِ کننگانے۔ اسکیم نا رِد اٹ موٹرسائیکل خواجہ غاتے 5 لیٹر وخت اس کہ 800 سی سی اسکان گاڈی تا خواجہ غاتے 10 لیٹر پٹرول نا ریلیف تننگک، رجسٹریشن کن صارف نا موبائل سم و شناختی کارڈ اسہ پن آ مننگ المی ءِ۔ پی ٹی آئی نا دھرنا تا کال کوکا اسے، جوان دا مریک کہ دا جماعت دھرنا تا سیاست ءِ بس کرسا الس نا خذمت نا سیاست ءِ کے۔ بنجائی وزیر حوالکاری وشینکاری عطا اللہ تارڑ وزیر پٹرولیم علی پرویز ملک و شزا فاطمہ تون اوار وزیراعظم فیول ریلیف اسکیم نا بابت پریس کانفرنس کرسا پارے کہ وزیراعظم ہمو بندغ آتیکن خصوصی ریلیف اسکیم نا بناءِ کرینے ہرافتیا تیل انا نہاد آتیٹی ودکی نا کل آن زیات باریم تماسس، دا وڑ انا نظام داکان مست ہچ دراستی راستی متنے‘ او پارے کہ ریلیف دوئی کننگ کن 9771 آن دوئی مروک ٹوکن پیٹرول پمپ آ نشان تروئی مریک‘ وزیراعظم نا خصوصی پارت ءِ کہ ریلیف نا آسراتی رسینگ آن پد کرا تیٹی بایدے ودکی مف۔ او پارے کہ حکومت چندرکاری کن کیہی گام گیج کننگ اٹی ءِ، منہ گام گیج برجا تخنگانو وخت اس کہ منٹ نا تا جاچ ہلنگ انگ ءِ۔ پی ٹی آئی آ تنقید کرسا وزیر حوالکاری پارے کہ خیبر پختونخوا ٹی پی ٹی آئی نا حکومت ءِ، جوان دادے کہ او ماڈل گورننس نا درور آتے مون آ اتوسس، ولے دھرنا تا کال کوکا اسے۔ پی ٹی آئی تینا 12 و نیم سال نا دورِ حکومت نا ہندن ءُ ڈٹ اس پیدوار کے ہرادے ماڈل پراجیکٹ گوندنگ مرے۔ او پارے کہ پی ٹی آئی دھرنا تا سیاست ءِ السا الس نا خذمت نا سیاست ءِ کے، مسلم لیگ (ن) نا حکومت مدام خذمت نا سیاست ءِ تینا شعار جوڑ کرینے، دانش اسکول و میٹرو بس کون ماڈل ڈٹ ترسا وخت اس کہ پنجاب حکومت نا ڈٹ آتے مچ آ دنیا ٹی امنا انگ انگ ءِ۔ وزیر حوالکاری پارے کہ وزیراعظم قول کریسس کہ تنخواہ دار تپہ کن بجٹ اٹی گنجائشت ودی کننگک، ہندا قول انا رِد اٹ ٹیکس سلیب آتیٹی کمتی اتنگا، ایکسپورٹر آک ہم بجٹ نا ستاءِ کریر۔ آئی ایم ایف پروگرام اٹی مرسا ہندن اصلاحات کننگا ہرافتا جہانی کہول آ ستاءِ کننگا۔ او پارے کہ جنگ انا سوب آن بحری جہاز آتا ہن وبر زہمی مسنے، ولے آئل سپلائی نا بست و بند آتا سوب آن لوڈشیڈنگ ءِ کم آن کم تخنگ نا کوشست کننگ انگ ءِ۔ بجلی نا بشخ اٹی تاریخی اصلاحات کننگا، آئی پی پی تا ویل ایسر کننگا و الس کن گنجائشت ودی کننگا، پاور سیکٹر اٹی ودیک اصلاحات آ ہم پبی چکار کننگ انگ ءِ۔ بنجائی وزیر پٹرولیم علی پرویز ملک بریفنگ اٹی پارے کہ حکومت جہانی تیل تنکی نا وخت آ الس ءِ ریلیف تننگ کن کل وسیلہ غاتے کاریم اٹ ایس، پرائیویٹ ریفائنریز آک وزیراعظم نا خواست آ ریفائنڈ گڑاتا فارمولہ ٹی بدلی کریر وخت اس کہ ہندی وڑ اٹ ودی مروک ڈیزل نا خڑچ انا رِد اٹ اودے اڑزان فراوان کننگ کن گام گیج کننگا۔