ڈیجیٹل زرگزران پیداوار، واپار و حکمرانی نا کسب ءِ تیز کننگ نا وڑ اسے، احسن اقبال

ارومچی، بنجائی وزیر ڈٹ بندی احسن اقبال پارینے کہ ڈیجیٹل زرگزران پیداوار، واپار‘ حکمرانی ان کسب و انسانی شونداری نا رفتار ءِ تیز کننگ نا اہم ءُ وڑ اسے‘ ڈیجیٹل کمکاری ٹی پت، رازداری، سائبر سیکورٹی، شفافیت و قومی وتواجہی نا اصول آتے اولیت تننگے۔ بنجائی وزیر ڈٹ بندی احسن اقبال اِرا دے ئی سرکاری دورہ چین آ، ڈیجیٹل اکانومی فورم اٹی بشخ ہلنگ کن ارومچی آ سر مس۔ احسن اقبال ایس سی او ڈیجیٹل اکانومی کمکاری نا وزارتی کہولی دیوان اٹی بشخ ہلک و تران کرے۔ احسن اقبال پارے کہ ڈیجیٹل زرگزران پیداوار، واپار‘ حکمرانی نا کسب و انسانی شونداری نا رفتار ءِ تیز کننگ نا اہم ءُ وڑ اسے، ای پاکستان، اڑان پاکستان نا پنچ بنداوی تمبہ غاتیٹی اوار ءِ، ڈیجیٹل بدلی پاکستان نا شونداری ایجنڈا نا بنجا ءِ۔ احسن اقبال پارے کہ ڈیجیٹل نیشن پاکستان ایکٹ، پاکستان ڈیجیٹل اتھارٹی و قومی اے آئی پالیسی ڈیجیٹل بدلی نا بنداو ءُ، پاکستان و چین نا نیام اٹی اے آئی‘ کلاؤڈ کمپیوٹنگ، سائبر سیکورٹی، پٹ وپول و ہنرمندی نا بشخ آتیٹی کمکاری نا بھلو وارخواہی ارے ایس سی او ڈیجیٹل کنیکٹیویٹی اینڈ کمپیوٹ کوریڈور نا جوڑ کننگ نا سلاہ، سیم آن ایپار فائبر رابطہ، ڈیٹا سنٹرز و سیٹلائٹ حوال آتے شون تننگ آ زور شاغا و پارے کہ ڈیجیٹل کمکاری ٹی پت، رازداری، سائبر سیکورٹی، شفافیت و قومی وتواجہی نا اصول آتے اولیت تننگے۔