الس رکھوک ہند آتیا گدریفنگ نا بابت کمامدارآتا پارت آتیا عمل کے، شیری رحمان

اسلام آباد: بنجائی وزیر موسمیاتی بدلی شیری رحمان سندھ و بلوچستان کرکی علاقہ غاتا الس آن خواست کرینے کہ او رکھ ہند آتیا گدریفنگ نا بابت تعلقدار کمامدارآتا پارت آتیاعمل کیر، سمندری طوفان بپرجوائے ناپنچ شنبے نادے آکرکی علاقہ غاتون ڈوک لگنگ نا پیشنگوئی ءِ، کراچی کن چنکا جہاز آتا پرواز آتے بند کننگانے وخت اس کہ عام جہاز آتا بابت اینو شام اسکان فیصلہ کینہ، وزیراعظم نا جوڑ کروک کمیٹی پدریسہ رابطہ ٹی ءِ، این ڈی ایم اے و صوبائی حکومت آک فعال ءُ۔ چارشنبے نادے آ قومی اسمبلی ٹی گپ وتران کرسا بنجائی وزیر موسمیاتی بدلی شیری رحمان پارے کہ سائیکلون بھلو دے اسے آن پیشنگوئی نا رداٹ مون آ ہِننگ ءِ، چندی ملک آتا سسٹم تون اواری اٹ کاریم کننگ ءِ۔ دا طوفان بھاز شدت تون پاکستان و انڈیا نا کرکی پٹی نا کنڈا ہِننگ ءِ۔ کسر ہمودے ہرانا نن پیشنگوئی ءِ کرینن۔ اوپارے کہ دا طوفان نا کیٹی بندر تون ٹکراؤ گمانی ءِ۔ 140آن 150 فی کلو میٹر نا رفتار اٹ تہوک چلینگ انگ ءُ۔ سندھ حکومت اونا مانیٹرنگ ءِ کننگ ءِ۔ ٹھٹھہ، سجاول، حب اتون اوار کراچی نا کرکی علاقہ زہمی مننگ نا اندیشہ ءِ، این ڈی ایم اے و سندھ و بلوچستان حکومت تون اواری اٹ وزیراعظم نا کنڈآن جوڑ کروک کمیٹی پورو وڑاٹ فعال کڑد ادا کننگ ءِ، کرکی علاقہ غاتا طوفان آن زہمی مخلوق کن چندی سرکاری ماڑی تیٹی 75 ریلیف کیمپ جوڑ کننگانے، ہموڑے مخلوق ءِ سرکننگانے، داتم اسکان 62 ہزار بندغ آتے کیمپ آتیا گدریفینن۔

(اے پی پی)