سپریم کورٹ نا گورنر اسٹیٹ بینک ءِ الیکشن کمیشن ءِ فنڈ تننگ نا پرمان

اسلام آباد: سپریم کورٹ پنجاب اٹ گچین کاری تیکن قائم مقام گورنر اسٹیٹ بینک ءِ الیکشن کمیشن ءِ فنڈ تننگ نا پرمان کرے۔ پنجاب اٹ گچین کاری تیکن فنڈ جاری کننگ ناباندات آ چیف جسٹس نا کماشی ٹی اونا چیمبر اٹ سماعت مس‘ سپریم کورٹ اٹ مروک دا چیمبر سماعت اٹ بینچ انا ہر مسٹ آ باسک آک ساڑی ئسر ہرافتے ٹی چیف جسٹس ناکماشی ٹی جسٹس اعجازالاحسن و جسٹس منیب اختر سماعت کریرہ داڑتون اوار اٹارنی جنرل، سیکرٹری الیکشن کمیشن، وزارت خزانہ و اسٹیٹ بینک کمامدار آک ہم چیمبر اٹ پیش مسر‘ حوالی نا رد اٹ سماعت نا وخت آ قائم مقام گورنر اسٹیٹ بینک تون اوار بروک ایلو افسر آتے چیمبر آن پیشن کشنگا وخت اس کہ وزارت خزانہ نا اسپیشل و ایڈیشنل سیکرٹری تون اوار ایلو کمامدار آتے ہم سماعت ناوخت آ پیشن کشنگا۔ اٹارنی جنرل، سیکرٹری وڈی جی لاء الیکشن کمیشن سماعت نا وخت آ ساڑی ئسر حوالی نا رد اٹ جج آک گچین کاری تیکن فنڈ جاری کپننگ آ ترند مرسا پیدوار کریر کہ عدالتی پرمان آ عمل کروئی تمک۔ حوالی نا رد اٹ سماعت ناوخت آ اٹارنی جنرل آن حکومتی موقف ءِ پیش کننگ ناوخت سخت ءُ سوج کننگا۔ اٹارنی جنرل پارے کہ بنجائی حکومت سپریم کورٹ نا 4 اپریل ناپرمان آ عملدرآمد کرینے‘ سپریم کورٹ نا پرمان آ فیڈرل کنسولیڈیٹڈ فنڈ آن پیسہ کن بل ءِ پارلیمنٹ اٹ پیش کرے‘ پارلیمنٹ گچین کاری تیکن فیڈرل کنسولیڈیٹڈ فنڈ جاری کننگ نا بل ءِ مسترد کرے‘ پارلیمنٹ آن بل انا مسترد مننگ آن پد حکومت اسٹیٹ بینک ءِ فنڈ جاری کننگ ناپاننگ کپک‘ حوالی نا رد اٹ سپریم کورٹ قائم مقام گورنر اسٹیٹ بینک ءِ الیکشن کمیشن ءِ فنڈ جاری کننگ ناپرمان کرینے۔

(مانیٹرنگ ڈیسک)