پاکستان ءِ چین آن 300 ملین ڈالر نا قسط اینو رسینگک، اسحاق ڈار

اسلام آباد/ واشنگٹن: بنجائی وزیر خزانہ و محصولات سینیٹر محمد اسحاق ڈار پارینے کہ انڈسٹریل اینڈ کمرشل بینک آف چائنا نا کنڈآن پاکستان کن 1.3 ارب ڈالر نا مالی آسراتی نا آخیریکو قسط اینو اسٹیٹ بینک ءِ ملک۔ جمعہ نادے آ تینا ٹویٹ اٹی وزیرخزانہ پارے کہ انڈسٹریل اینڈ کمرشل بینک آف چائنا نا کنڈآن پاکستان کن پڑو کروک 1.3 ارب ڈالر نا مالی آسراتی نا رداٹ 300 ملین ڈالر نا مسٹ میکو و آخیریکو قسط اینو اسٹیٹ بینک ءِ ملک۔ وزیر خزانہ پارے کہ الحمداللہ دا قسط آن پاکستان نا زرمبادلہ نا کوڑی تیٹی ودکی مریک۔ یات سلے کہ یواے ای نا کنڈآن ہم پاکستان کن 1 ارب ڈالر مالی آسراتی نا باوری کرفنگانے۔ داکان مست سعودی عرب پاکستان کن اِرا ارب ڈالر نا مالی آسراتی نا پڑو کریسس۔ داکان بیدس بنجائی وزیر خزانہ و محصولات سینیٹر محمد اسحاق ڈار پارینے کہ یواے ای نا کمامدارآک آئی ایم ایف ءِ پاکستان کن اسہ ارب ڈالر نا ہڑتوم آ کنڈآتا مالی کمکاری ءِ پک کرینو۔ جمعہ نادے آ تینا اسہ ٹویٹ اسے ٹی وزیر خزانہ پارے کہ اسٹیٹ بینک آف پاکستان یواے ای آن ہندا ڈیپازٹ آتا دوئی کننگ کن المی دستاویز آتا تیاری ٹی اختہ ءِ۔ یات سلے کہ داکان مست سعودی عرب نا کنڈآن پاکستان کن 2 ارب ڈالر نا مالی کمکاری ءِ پک کرینے۔ پاکستان و آئی ایم ایف نا نیام اٹ زوت سٹاف کہول آ معاہدہ مریک۔ ایلو کنڈ ّآجہانی بینک و جہانی مالیاتی فنڈ (آئی ایم ایف) ناموسم بہار ناسالانہ دیوان نا وخت آ پاکستانی ڈل جہانی بینک انا ملٹی لیٹرل انویسٹمنٹ گارنٹی ایجنسی تون میٹنگ کرے۔ پاکستانی ڈل سیکرٹری خزانہ حامد یعقوب شیخ و سیکرٹری اقتصادی امور ڈویژن ڈاکٹر کاظم نیاز و گورنر اسٹیٹ بینک جمیل احمد آ تالان ءِ، وخت اس کہ امریکہ ٹی پاکستانی سفیر مسعود خان ہم کمک فراوان کننگءِ۔ پاکستانی ڈل جہانی بینک انا ملٹی لیٹرل انویسٹمنٹ گارنٹی ایجنسی ءِ ملکی اقتصادی حالیت و مون تروک چیلنج آتیان معلومدار کرے۔ ڈل آجو زرگزران نا سوگوی و پائیدار اقتصادی نمو کن ساڑی حکومت نا کنڈآن چست کروک آ گام گیج آتیان ہم معلومدار کرے۔ یات سلے کہ وزیر خزانہ سینیٹر محمد اسحاق ڈار جہانی بینک و آئی ایم ایف نا سالانہ دیوان نا وخت آ مروک آ میٹنگ آتیٹی اسلام آباد آن ورچوئل بشخنگ ہلنگ ءِ۔

(اے پی پی)