سینٹ حقی چنکا پاکستان نا ڈیک ءِ ایتک، صادق سنجرانی

اسلام آباد : سینیٹ نا 50سال انا دود انارد اٹ سینٹ نا خصوصی دیوان چیئرمین صادق سنجرانی ناکماشی ٹی پارلیمنٹ ہاؤس اٹ اڈہلک‘ دیوان آن تران کرسا چیئرمین سینٹ صادق سنجرانی پارے کہ اینو سینٹ آف پاکستان حقی معنہ اٹ چنکا پاکستان نا ڈیک ءِ تننگ اٹی ءِ‘ دا یاتگیری دیوان ننا پارلیمانی، آئینی و قومی تاریخ اٹ بھاز اہم ءِ‘ او پارے کہ دا دیوان ایوان نا 50سال ءِ اڈ تننگ نا رد اٹ بٹنگ انگا‘ دا یوان نیمہ کرن مست پاکستان پارلیمنٹ نا بنا کروک سفر ءِ برجا تخنگ و دا وخت اٹ دوئی کروک سرسہبی تے مون آ اتنگ نا عزم انا درشانی ءِ‘ او پارے کہ بنجا ءِ سوگو کننگ‘ قومی یکجہتی و سیوت وبنجائیت نا اواری نا کمک اٹ نمائندہ و بریبری پارلیمانی نظام ءِ شون تننگ نا دا جہد برجا سلک‘ اوپارے کہ آئین بیرہ جوڑ کروک آتیکن آخا بلکہ بروک آچین اکن ہم مریک‘ ہندا سوب آن المی ءِ کہ داٹی بروک چین تا گرج و خواست آتیکن ترمیم نا گنجائشت مرے‘ او پارے کہ پاکستان نا اولیکو دستور ساز اسمبلی نا کنڈآن منظور کروک قرار داد مقاصد آن ہلیس اینو اسکان پاکستان نا آئینی سفر نا خاصہ مسنے‘ او پارے کہ سامراجی تسلط آن آجوئی آن پد اسہ ہندن ءُ آئین اسے نا مننگ المی ئس ہرا متکن آ نظام اٹ ساڑی بے بریبری ءِ چٹفنگ نا ضمانت مرے‘ او پارے کہ پاکستان نا اولیکو دستور ساز اسمبلی نا دیوان 10اگست 1947 آ کراچی ٹی اڈہلک ہرادے پاکستان نا دستور جوڑ کننگ نا زمواری تننگا و ہمو اسمبلی 12مارچ آ قرارداد مقاصد ءِ منظور کرے ہرا اوکان گڈ پاکستان نا دستور نا المی جز سرمس و اینو اسکان دستور نا ابتدائیہ نا وڑ اٹ اوار ءِ‘ او پارے کہ پاکستان نا ارٹمیکو دستور اسمبلی پاکستان نا اولیکو دستور ءِ منظور کرے‘ ہمودستور اٹ ایوان اٹ اسٹ انگا ایوان اٹ حکومت نا وڑ انا دروشم ءِ پیش کرے و ہمو دستور نا رد اٹ قومی اسمبلی نا اولیکو دیوان ءِ اڈ تننگا۔

(آن لائن)