ریاست ءِ بچفنگ کن تینا سیاست ءِ گہو تخان، شہباز شریف

اسلام آباد: وزیراعظم محمد شہباز شریف پارینے کہ بنجائی حکومت قومی اسمبلی نا لس گچین کاری تا وخت آ اڈتننگ کن تینا آئینی و کانودی زمواری تے پورو کیک، آئی ایم ایف تون تدوک آ حکومت آئینی و جمہوری وڑاٹ تینا حکومت نا چٹنگ ءِ خنسا انحراف کرے، نن او معاہدہ نا پاسداری ءِ کرینن و اومیت ءِ کہ دا معاہدہ زوت مریک۔ چارشنبے نادے آ سی پی این ای نا ڈل اتون گپ وتران کرسا وزیراعظم پارے کہ آئی ایم ایف تون تدوک آ حکومت معاہدہ کرے و ہراتم جنوری، فروری ٹی اودے علم مس کہ اونا برخلاف آئینی و کانودی وڑاٹ اودے اینک کننگ انگ ءِ تو تینا ہی معاہدہ غان نمن مس، دا نجی معاہدہ اس الوکہ بلکن پاکستان نا ریاست نا آئی ایم ایف تون معاہدہ ئس۔ دا نمن مننگ نا ہرا نسخان مس او غٹ انا مون آٹے، و داسہ ہندن ءُ شڑت ہرافتے تدوک آ حکومت ءِ منوئی ئس داسہ آئی ایم ایف پارے کہ اوفتیا من و عن عمل کینہ و اوفتا باقاعدہ جاچ ءِ ہلنگ نا ہیت کرے۔ اوپارے کہ ننے داہیت ءِ منوئی تمانے داسہ ننے اومیت ءِ کہ سٹاف لیول آ معاہدہ زوت مریک و ولدا او بورڈ آکاہک۔ اوپارے کہ ننا 11 تُو انا سیوتی حکومت ءِ دا تاثر ئس کہ دا سیوتی حکومت شہباز شریف چلیفنگ کپک ولے غٹ سیوتی تا مثبت کڑد انا سوب آن دا حکومت سلوک ءِ و تاریخ اٹی اولیکو سیوتی حکومت داحالیت آتیٹی یک جان اِرا است ءِ و مون آ ہِننگ ءِ۔ اوپارے کہ حکومت مشکل حالیت آتیٹی فیصلہ کرے، کفایت شعاری آ اجتماعی دانش اٹ فیصلہ کننگا، ہراڑا دمدستی کابینہ کمیٹی اس جوڑ کننگا۔ ہرانا مسہ دیوان مسنو داڑا بھاز پیش رفت ءِ بروک آ ہفتہ اونا دیوان ءِ ای تینٹ چیئر کیوہ۔ اوپارے کہ حکومت سنجیدگی اٹ ہمو سلاہ تیا عمل کیک۔ غٹ کابینہ باسک آک ہم اوٹی تفرہ۔ اوپارے کہ پاکستان نا تاریخ نا غٹ آن بھلا نوکاپ بس بنجائی حکومت خالصتا تینا وسیلہ غاتیان شفافیت اتون بے نظیر انکم سپورٹ پروگرام و این ڈی ایم اے نا کمک اٹ نوکاپ زہمی تیکن 100 ارب روپئی خڑچ کرے، نن ہرجاگہ غا ہنان۔ جنیوا ٹی زہمی تیکن مروک آ ڈونرکانفرنس نا پڑو آتے عملی دروشم اس تننگ کن کوشست کننگ ءِ۔ ترکیہ و شام اٹی بھسکار زمی جمب بس، ہراٹی لکھ آ اُراک بھس و کروڑآبے اُرا مسر، ترکیہ پاکستان اسہ ہندن ءُ رشتہ سے ٹی تفوک ءُ اوفتے کن کمکی گڑا گدریفنگ اُن، ترکیہ ٹی تمبو تا زیات گرج ءِ، شام اٹی خور، دوائی و پچ آتا گرج ءِ، پاکستان نا الس اوڑا تینا حق ءِ ادا کننگ نا پورو کوشست کننگ اٹی ءِ۔ اوپارے کہ گچین کاری تا وخت آ اڈتننگ آئینی و کانودی گرج ءِ داڑان ملک مون آ کاہک۔ دا بابت بنجا تینا فرض انا ادائیگی ءِ پورو کننگ ءِ، 2021اٹی تدوک آ حکومت نا دور اٹی مردم شماری دُوارہ کرفنگ نا فیصلہ مسوسس۔ تدوک آ مردم شماری آ گڑا س صوبہ و سیاسی جماعت آتے بھاز گڑتی ئس، دا فیصلہ مشترکہ مفادات کونسل نا ءِ اوباقاعدہ بناکرینے، داڑکن فنڈ ہم تننگانے۔ داڑآ گڑاس صوبہ غاتے اعتراض ارے اوفتے تون اینو اوڑدہی ءِ۔ او اوفتا گڑتی تا ازالہ ءِ خواہک، اوفتے ہم کمک کروئی ءِ، نن خوانہ کہ وخت زیان مننگ آن بیدس داکاریم پورو مرے۔ نن مالی چیلنج آتیان پد ہم مالی کمک کرینن تانکہ دا عمل وخت آ پورو مرے۔

(اے پی پی)