عمران نیازی نا دزگیر مفننگ کانود نا بے سہبی ءِ، احسن اقبال

اسلام آباد: بنجائی وزیر ڈٹ بندی شونداری و اصلاحات و خصوصی گام گیج احسن اقبال پارینے کہ پاکستان اٹی فیصلہ ئی ریسہ اس بسنے، مگہ آئین، کانود و عدالت بیرہ نزور اکن مریرہ و ہراڑتون ٹولی مریک او آئین آن ایڑترمریک؟۔ تینا ٹویٹ اٹی پارے کہ عمران نیازی دزگیر مفک تو کانود باایتک، و فاشزم کٹک۔ پاکستان اسہ پوسکن ءُ ہٹلر اسے سگنگ کپک، مچ آ دنیا خننگ ءِ کہ ہراوڑ اسہ اناپرست بندغ عمران نیازی نظام عدل ءِ یرغمال کرینے عدالت نا پرمان ءِ لتاڑنگ ءِ، کارندہ غاتے شیلڈ جوڑ کرسا تینا اُراٹی مورچہ زن ءِ۔ تینا کارندہ غاتیان قومی ادارہ غاتے کرینگ ترفنگ ءِ۔ فارن فنڈنگ عمران نا کمک اٹ انارکی تالان کرسا رنگ اس اتنگ ءِ۔ ہندن بنجائی وزیر سائنس و ٹیکنالوجی و مرکزی سیکرٹری حوالکاری بی این پی آغاحسن بلوچ پارینے کہ عمران خان دزگیری آن داخہ در خلیک کہ تینا سیاسی ورکرآتا جان و مال انا اودے ہچ ءُ پرواہ اس اف۔ پی ٹی آئی چیئرمین نا دزگیری نا برخلاف مزاحمت نا بابت چارشنبے نادے آ تینا بیان اٹی او پارے کہ اگہ عمران خان بے گناہ مسکہ تو زندان آ ہِننگ آ انت قباحت اس ئس، وزیراعظم شہباز شریف نا کماشی ٹی پی ڈی ایم نا مخلوط حکومت ہراوڑ صبر و سگ انا درشانی ءِ کرے و سیاسی کارندہ غاتا برخلاف واک انا کاریم اٹ اتنگ آن پاناد کرے داستاکڑزک۔ اگہ مستین نا حکمران بلوچستان اٹی داوڑنا رویہ اختیار کریکہ تو یقینا ہموجاگہ نا مخلوق نا مشکل آتیٹی داخہ در ودکی متوکہ۔ اوپارے کہ شیخ رشید ہراتحریک انصاف نا حکومت اٹ بلوچ قبیلہ غاتا برخلاف اناپ شناپ بکواس کریکہ تدوک آ منہ دے آن مرمراسکان نظر بفننگ ءِ و خاموش رہینگسا نئے بیرہ جان نا امان بلکن پک کرے او ہم بھلو نرزور ءُ بندغ اسے۔ داکان بیدس قومی وطن پارٹی نا چیئرمین آفتاب احمد خان شیرپاؤ پارینے کہ عمران نیازی عدالتی فیصلہ و کانود نا شرف ءِ کننگ نا جاگہ غا جلاؤ گھیراؤ و جھیڑہ ءِ تہو تننگ اٹی ءِ۔ تدوک آ دے تینا اسہ ٹویٹ اسے ٹی چیئرمین قومی وطن پارٹی آفتاب احمد خان شیرپاؤ پارے کہ عمران نیازی عدالتی فیصلہ و کانود نا شرف ءِ کننگ نا جاگہ غا جلاؤ گھیراؤ و جھیڑہ ءِ تہو تننگ اٹی ءِ تینے قومی لیڈر اس پاروک آ لغور بندغ دزگیری آن بچنگ کن لس ورکرآتے ڈھال کرسا نظام ءِ ژند کرسا تینا سیاست نا دروغ انا اناکی تسکین خواہک۔

(اے پی پی)