پاکستان نا شونداری مالیاتی شین اتون گنڈوک ءِ، اسحاق ڈار
گولڈن جوبلی نا وخت آ نن بایدے ہمو چاہندار راہشون و کانود ساز آتے ہم یات تخن ہرافک 1973ء نا آئین ءِ تسر
اسلام آباد: وزیرخزانہ و محصولات سینیٹر اسحاق ڈار پارینے کہ پاکستان نا شونداری، شونہالی و سوگوی پارلیمانی نظام نا چرجوئی و مالیاتی نظم و نسق اٹی ءِ، سینیٹ آف پاکستان بنجانا نشانی و غٹ اکائی تیٹی سیوت و یکجہتی کن نمان ءُ کڑد اس تخک، سینیٹ نا گولڈن جوبلی نا وخت آ نن بایدے ہمو چاہندار راہشون و کانود ساز آتے ہم یات تخن ہرافک 1973ء نا آئین ءِ تسر و داٹی غٹ صوبہ غاتے سینیٹ اٹی رقبہ رقبہ و آبادی آن ایڑترمرسا اسہ وڑ نمائندگی تس۔ چارشنبے نادے آ سینیٹ نا گولڈن جوبلی دود آتا چرجوئی ٹی اڈ ہلوک خصوصی دیوان آن تران کرسا وزیرخزانہ پارے کہ سینیٹ نا 50سال انا گولڈن جوبلی نا دود آتا وخت آ گپ وتران کنکن شرفمندی اسے وخت اس کہ دا رنگ رنگی دود انا اڈتننگ آ چیئرمین سینیٹ و ٹیم ہم مبارکباد نا حقدار ءُ۔ اوپارے کہ پاکستان نا سینیٹ نا 50 سال تاریخی مزل نا نشان ءِ۔ سینیٹ جمہوری قدر انا سوگوی، حق انا رکھ و غٹ صوبہ غاتا بریبری نمائندگی ٹی اہم ءُ کڑد اس ادا کرے۔ سینیٹ نا 50 سال انا سرسہبی تا ذکر ءِ کننگ تون اوار اوار ننے دا دارہ نا سوگو تاریخ و اومیت آتے ہم مون آ تخوئی مریک۔ اوپارے کہ او 20 سال آن دا ایوان نا باسک ءِ۔ اوداکان بھاز انگا بطور پارلیمنٹرین بھاز گڑا ہیل کرینے۔ او دا ایوان نا کڑد انا گواہ ءِ۔ 12 اکتوبر 1999 نا تہار دے آن مست او دُوارہ قومی اسمبلی نا باسک رہینگا۔ وزیرخزانہ پارے کہ دا قومی و صوبائی سرکڑدہ غاتا بھلو اجتماع اسے۔ دا یکتا دود اٹی بشخ ہلنگ شرفمندی اسے ہرا قومی سلامتی و سیوت نا نشانی ءِ۔ داہاؤس پاکستان ءِ بطور بنجا سوگو کننگ اٹ نمان کڑد اس تخک۔ اوپارے کہ پارلیمنٹ خاص وڑاٹ سینیٹ ءِ بنجانا مرکز و پارلیمانی وجمہوری حقی نمائندہ نا وڑاٹ ہم ہروئی مریک۔ ننے داصاحب بصیرت سرکڑدہ و کانود سازآتے ہم یات تخوئی مریک ہرافک دا آئین ءِ جوڑ کریر و داٹی غٹ صوبہ غاتا اسہ وڑ نمائندگی کن سینیٹ نا وجود ءِ تسر۔ اوپارے کہ ننے سینیٹ نا گولڈن جوبلی نا وخت آ بریبری، اجتماعیت، صوبائی وتواجہی و ملک اٹی پارلیمانی جمہوریت نا سوگوی کن ہم تینا عزم انا درشانی ءِ کروئی مریک۔ اوپارے کہ وفاقیت ءِ برقرار تخنگ و ہڑتوم آ ایوان تا نیام اٹ واک انا توازن کن سینیٹ نا کڑد اہم ءِ۔ دا صوبہ غاتا نیام اٹ جھیڑہ غاتا ایسری کن اسہ اہم ءُ ادارہ اسے۔ داوخت آ چیئرمین سینیٹ نا کنڈآن وزیرخزانہ ءِ خصوصی شیلڈ اس تننگا۔
(اے پی پی)