یوم آزادی ننے آجوئی نا بھلا نعمت تون اوار قومی قول انا ہم یات ترفک،میر ظہور بلیدی

تربت، صوبائی وزیر میر ظہور بلیدی جشنِ آزادی پاکستان نا وخت آ مچ آ قوم و خاص وڑ اٹ بلوچستان نا الس ءِ مبارکبادی ترسا پارینے کہ 14 اگست ننے آجوئی نا بھلا نعمت تون اوار اوار تینا قومی قول انا ہم یات ترفک۔ او پارے کہ بلوچستان پاکستان نا اہم و پنپروک بشخ اسے‘ دا صوبہ نا الس پاکستان جوڑ مننگ آن ہلیس اینو اسکان ملک انا سلامتی، سوگوی و شونداری ٹی اہم کڑد ادا کرینے۔ بلوچستان نا الس نا محرومی تا چٹفنگ‘ ورناتے گچین وارخواہی تا فراوانی و صوبہ ٹی مدامگی شونداری ننا کل انا راجی زمواری ءِ‘۔ میر ظہور بلیدی پارے کہ بلوچستان نا شونداری اصل اٹ پاکستان نا شونداری ءِ‘ صوبہ نا بھلا قدرتی وسیلہ، کرکی پٹی، معدنی کوڑی‘ لائخ آ ورنا چین پاکستان نا زرگزرانی شون نا اہم ءُ وسیلہ اس جوڑ مننگ کیرہ۔ گرج دا ہیت نا ءِ کہ بلوچستان نا وسیلہ غاتیان دوئی مروک فائدہ غاتیٹی صوبہ نا الس ءِ اوفتا روا انگا بشخ تننگے و شونداری نا بھرم آتے لس بندغ اسکان رسیفنگے۔ او پارے کہ بلوچستان نا ورنا چین ننا نہادی ءُ میرات اسے۔ تعلیم، روزگار، پوسکنوڑ کسب و کاروباری وارخواہی فراوان کرسا اوفتے قومی دنگ اٹ پین گچین وڑ اٹ اوار کننگ مریک۔ بایدے حکومت نا اولیت دا مرے کہ کہ بلوچستان نا ورناتے تینا آخبت نا جوڑ کننگ نا بریبر وارخواہی فراوان کننگے۔صوبائی وزیر پارے کہ بلوچستان اٹی امن، سیاسی سوگوی و زرگزرانی شونداری اسہ ایلو تون گنڈوک ءُ۔ امن مس تو زرکاری بریک، روزگار نا وارخواہی ودک‘ و الس نا زند انا آب اٹی جوانی بریک۔ دا مسخت کن کل سیاسی و راجی واک آتے اسیجائی وڑاٹ مونی بروئی مریک۔ میر ظہور بلیدی پارے کہ 14 اگست ننے دا کلہو ایتک کہ اختلاف آن پد ہم قومی فائدہ‘ آئین، جمہوریت و پاکستان نا سیوت آ کل اسٹ مریر۔ بلوچستان نا الس اسہ پرامن، شوندار وشونہال پاکستان اس خواہک و و دا قومی سفر اٹی تینا کڑد ادا کرسا کیک‘ او پارے کہ اینو نا دے ننے تحریکِ پاکستان نا راہشون، شہید، غازی و ہمو کل بندغ آتے خراجِ عقیدت پیش کروئی ءِ ہرافک پاکستان کن قربانی تسر۔ او دا عزم انا درشانی ءِ کرے کہ ہندن ءُ بلوچستان اس جوڑ کننگے ہراڑے امن مرے، ورناتے روزگار مرے‘ ہر چنا ءِ تعلیم رسینگے‘ الس ءِ بنداوی آسراتیک دوئی مریر و صوبہ نا وسیلہ غاتیان بلوچستان نا الس نا زند اٹ شونہالی برے۔ میر ظہور بلیدی دعا کرے کہ اللہ تعالیٰ پاکستان ءِ امن، سوگوی، شون و شونہالی ایتے و بلوچستان تون اوار ملک نا کل صوبہ غاتا الس ءِ شونہال آخبت نصیب کے۔