14 اگست ننے اسلاف آتا قربانی تے یات کرفنگ نا کسر ہیل ایتک، شعیب نوشیروانی

کوئٹہ، صوبائی وزیر خزانہ و معدنیات میر شعیب نوشیروانی جشنِ آزادی 14 اگست نا وخت آ قوم، خاص وڑ اٹ بلوچستان نا الس ءِ مبارکبادی ترسا پارینے کہ پاکستان بھلاتا بھلا جہد وقربانی‘ مثالی عزم انا بھرم ءِ‘ او پارے کہ 14 اگست ننے تینا اسلاف آتا قربانی تے یات کرفنگ، وطن تون مہر انا عہد انا دوارگی و ملک انا شونداری وشونہالی کن اسٹ مرسا کڑد ادا کننگ نا کسر ہیل ایتک۔پاکستان نا سلامتی، وتواجہی و سوگوی ننا کل انا اسیجائی زمواری ءِ۔ صوبائی وزیر میر شعیب نوشیروانی پارے کہ بلوچستان نا الس مدام ملک انا سلامتی، سوگوی و شونداری کن بھاز قربانی تسنے۔ حکومت بلوچستان صوبہ نا الس نا زرگزرانی و راجی شونداری، روزگار نا وارخواہی، بنداوی آسراتی و مدامگی شونداری کن پبی گام گیج کننگ ءِ‘ صوبائی وزیر پارے کہ ننے قومی یکجہتی، ایلمداری، سگ و تین پہ تینی شرف ءِ شون ترسا ملک ءِ مون تروک چیلنج آتتون اسیجائی وڑاٹ مون تروئی مریک۔ ورنا چین پاکستان نا روشنا آخبت ءِا اوفتے تعلیم، کسب و روزگار نا گچین وارخواہی فراوان کننگ ننا اولیکو اولیت آتیٹی اوار ءِ۔ او پارے کہ یومِ آزادی نا وخت آ ننے قول کروئی مریک کہ نن پاکستان نا شونداری، شونہالی و سوگوی کن تینا کل لائخی تے کاریم اٹ اتینہ و قائداعظم محمد علی جناح نا اصول آتے سیوت‘ ایمان و تنظیم ءِ تینا عملی زند انا بشخ جوڑ کینہ۔ میر شعیب نوشیروانی دعا کرے کہ اللہ تعالیٰ پاکستان ءِ مدام برجا تخے‘ ملک ءِ امن، شونداری وشونہالی عطا کے و بلوچستان تون اوار مچ آ ملک انا الس کن دا آجوئی نا دے ءِ خوشی و اومیت آتا کلہو پک کے۔