طالب علم آک ریاست مخالف تنظیم یا منفی پروپیگنڈہ غاتیٹی بشخ ہلپس،وزیراعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی جتا جتا صوبہ غاتا جامعہ غاتے ٹی اسکالرشپ آ بڑزکو تعلیم کن گچین مروک بلوچستان نا مار ومسڑ طالب علم آتتون اوڑدہی کرے‘ داوخت آ شونداری ڈٹ، گورننس، تعلیم و ایلو اہم باندات آتیا جم گپ وتران مس۔ دا وخت آ طالب علم آک وزیراعلیٰ غان جتا جتا باندات نا بابت سوج ہم کریر و وزیراعلیٰ سرجم ورندی تس۔ وزیراعلیٰ میر سرفراز بگٹی پارے کہ بلوچستان نا چندی ضلع غاتیان طالب علم آتا میرٹ آ بڑزکو تعلیم کن گچین کاری اوفتا روشنا تعلیمی آخبت نا ضمانت ءِ۔ اسکالرشپ کن گچین مروک گیشتر طالب علم آتا تعلقداری غریب و نیامی تپہ غان ءِ و اوفتے کن ملک انا بڑزکو جامعہ غاتے ٹی تعلیم دوئی کننگ نا وارخواہی اسہ اہم ءُ پیش رفت اسے۔ او پارے کہ ملک انا بڑزکو یونیورسٹی تے ٹی بلوچستان نا ورنا تا جتا جتا بشخ آتیٹی تعلیم دوئی کننگ ستا کڑزک۔ حکومتِ پنجاب نا کنڈ آن بلوچستان نا طالب علم آتے یونیورسٹی تے ٹی داخلہ تون اوار ٹیوشن و ہاسٹل فیس نا رد اٹ کمک فراوان کننگ ستا کڑزوک گام اسے، ہراڑکن بلوچستان نا الس نا کنڈ آن وزیراعلیٰ پنجاب مریم نواز شریف نا است انا ہب اٹ منت وار اُٹ‘۔ میر سرفراز بگٹی طالب علم آتیا زور شاغا کہ او ایلو صوبہ غاتا یونیورسٹی تے ٹی تعلیم دوئی کرسا نظم و ضبط، خواری و میرٹ ءِ تینا شعار جوڑ کیر۔ او پارے کہ بلوچستان نا ورنا ک ہراڑے کہ کار‘ تینا لائخی و مثبت کڑدار اٹ پاکستانیت نا پرچار ءِ کیر، انتئے کہ او بلوچستان و پاکستان نا سفیر ءُ۔ وزیراعلیٰ پارے کہ طالب علم آک ہچ ءُ ریاست مخالف تنظیم یا منفی پروپیگنڈہ اسے ٹی بشخ ہلپس و تعلیم نا دوئی نا کمک اٹ تینا لمہ باوہ نا اومیت آتے پورو کیر۔ او پارے کہ تصور و راستی ٹی فرق مریک، ریاست مخالف آک بے بریبر شونداری نا پن آ ورنا تا منفی ذہن سازی نا کوشست کیرہ، ہندا سوب آن طالب علم آتے دا وڑ انا بندغ آتیان ہشار مننگ ناگرج ءِ۔ او پیدوار کرے کہ پاکستان مدام برجا سلنگ کن جوڑ مسنے و قیامت اسکان سلک۔پاکستان ءِ بشخ و پانٹ کننگ نا تغ خنوک آک آمخ ءُ۔ او پارے کہ بلوچستان نا ورنا ک پاکستان نا آخبت نا جوڑ کروک آک ءُ و اوفتے تینا توانائی تے تعلیم، پٹ وپول ہنر و ملک و صوبہ نا شونداری کن کاریم اٹ اتوئی مریک۔ وزیراعلیٰ طالب علم آتتون ہیت وگپ ءِ جوان گوندسا پارے کہ ورنا تا سوج و اوفتا خیال آتے بِننگ حکومت نا اولیت آتیٹی اوار ءِ۔ او پارے کہ خوانندہ و لائخ آ ورنا ک بلوچستان ءِ شون، شونہالی و سوگوی نا کسر آ دننگ اٹ کڑد ادا کننگ کیرہ۔ دا وخت آ چیف سیکرٹری بلوچستان شکیل قادر خان، سیکرٹری ہائر ایجوکیشن صالح بلوچ ہم ساڑی ئس۔