آزادی تاریخی سرسہبی تون اوار زمواری اس ہم ارے، زرگزران سوگو، ورنا تے وارخواہی تروئی تمک،صدر مملکت/ وزیر اعظم

اسلام آباد، صدر مملکت آصف علی زرداری پاکستان نا 79 می یومِ آزادی نا وخت آ قوم و پیشن ملک رہینگوک پاکستانی تے مبارکبادی ترسا پارینے کہ آجوئی بیرہ تاریخی سرسہبی اس اف بلکن اسہ زمواری اسے ہرادے ہر چین ءِ مونی دروئی ءِ۔ پاکستان ءِ پین سوگو، رکھوک و شونہال کروئی مریک‘ تینا کلہو اٹی صدر مملکت قائداعظم محمد علی جناح، تحریکِ پاکستان نا راہشون و کارندہ و آجوئی کن قربانی تروک کل بندغ آتے خراجِ عقیدت پیش کرے۔ او پارے کہ تدوک آ سال پاکستانی قوم انا واکداری نا احساس ترفے، معرکہ حق پک کرے کہ پاکستان امن نا خواہندار ءِ‘ولے تینا وتواجہی و قومی فائدہ غاتا رکھ انا ارادہ و لائخی آن ہم شپ ءِ۔ آصف علی زرداری پارے کہ واک انا اصل سبخ زمواری ءِ‘ ہرا ملک تینا رکھ ءِ کننگ کے اودے تینا واک ءِ جھیڑہ غاتیان بچنگ، امن نا رکھ و الس نا فائدہ کن کاریم اٹ ہتوئی مریک۔ او ملک انا امن و سوگوی کن سلہہ بند فوج‘ کانود نافذ کروک ادارہ و پولیس نا شہید آتے خراجِ عقیدت پیش کرسا اوفتا پدخاہوت آتا قربانی تے ہم سلام پیش کرے۔ صدر مملکت پارے کہ پاکستان ڈیہہ اٹی مذاکرات و چک و تاڑ اٹی کمتی کن تینا سفارتی کاریم تے بھرمی وڑاٹ کاریم اٹ ایسنے‘ پاکستان نا موقف پیدوار ءِ کہ بھل کہ بھلا چک وتاڑ ہم اخیر مذاکرات و سفارتکاری نا کمک اٹ ایسر مننگ کیک۔ ہنداوڑ وزیراعظم محمد شہباز شریف پاکستان نا 79 می یومِ آزادی نا وخت آ قوم و پیشن ملک رہینگوک پاکستانی آتے مبارکبادی ترسا پارینے کہ آجوئی اللہ تعالیٰ نا بھلو نعمت اسے، ہرا نا دوئی کن ننا اسلاف آک بے کچ قربانی تسر۔ تینا کلہو اٹی وزیراعظم پارے کہ قائد اعظم محمد علی جناح، علامہ محمد اقبال و تحریکِ آزادی نا ایلو راہشون تا گچین سرکڑدہی و مسلمانانِ ہند انا بھلا جہد انا بھرم اٹی 14 اگست 1947ء آ آجو ملک اس جوڑ مس۔ اینو قوم تحریکِ آزادی نا راہشون، کارندہ و تینا سرکڑدہ غاتے خراجِ عقیدت پیش کیک۔ محمد شہباز شریف پارے کہ پاکستان اسلامی تعلیمات و بانیِ پاکستان نا نظریات نا رداٹ کل شاری تے بے فرق آجوئی، عزت و شرف اٹ زند تیر کننگ نا حق فراوان کیک، وخت اس کہ آئین و کانود شاری تا بنداوی حق آتا ضمانت ءِ‘ وزیراعظم پارے کہ خواری تیان پد ہم پاکستانی قوم دفاع، زرگزران، صنعت، تعلیم، سائنس، کشت و کشار، گوازی و ایلو بشخ آتیٹی نمان سرسہبی دوئی کرینے۔ لائخ آ ورنا چین، ہنرمندہیومن ریسورس‘ کسبی چاہندار و کشارگر و خواری کش آک ملک انا روشنا آخبت نا ضمانت ءُ۔ او پارے کہ حکومت تدوک آ دونیم سال اٹی مشکل آ ریسہ غاتیان گدرینگسا سوگو زرگزران نا مسخت دوئی کرینے و داسہ ملک شوندار زرگزران نا مزل نا کنڈ آ ہننگ اٹی ءِ‘ تدوک آ اِرا سال اٹ پیشن ملک رہینگوک پاکستانی تا زر راہی تس اٹ 11.3 ارب ڈالر نا ودکی حکومتی پالیسی تیا اوورسیز پاکستانی تا پت انا درشانی ءِ۔