صدر نا کنڈ آن منظوری،سپریم کورٹ نا جج آتا پوسکن آ تنخواہ 15 لکھ روپئی اسکان پک

اسلام آباد، سپریم کورٹ نا جج آتا تنخواہ، الاؤنس و پنشن پیکج اٹی نمان ودکی نا منظوری تننگانے۔ سپریم کورٹ نا جج آتا تنخواہ و مراعات آتے بنجائی آئینی عدالت نا جج آتا بریبر کننگانو، وخت اس کہ پوسکن آ تنخواہ و الاؤنس نا اطلاق 10 دسمبر 2025ء آن مریک‘۔ مون ناسال انا مالی فائدہ و ودکی نا بقایا جات آک ہم سپریم کورٹ نا جج آتے تننگرہ۔ صدر مملکت آصف علی زرداری بنجائی حکومت نا سفارش آ تعلقدار سمری نا منظوری ءِ تسنے۔ منظوری آن پد جاری مروک پِرمان سپریم کورٹ جج آتا تنخواہ پِرمان 2026ء پاننگک۔ منظوری نا رداٹ چیف جسٹس آف پاکستان نا تُوئی بنداوی تنخواہ 15 لکھ 50 ہزار روپئی کننگانے، وخت اس کہ سپریم کورٹ نا ایلو جج آتا تُوئی بنداوی تنخواہ 15 لکھ روپئی مریک۔ سپریم کورٹ نا جج آتا بنداوی تنخواہ 11 لکھ روپئی آن ودفسا 15 لکھ روپئی کننگانے، ہرا نا نتیجہ ٹی بنداوی تنخواہ ٹی کساس 4 لکھ روپئی توئی ودکی مریک۔ جج آتا جوڈیشل الاؤنس اٹی ہم نمان ودکی کننگانے۔ جوڈیشل الاؤنس 11 لکھ 61 ہزار 163 روپئی آن ودفسا 15 لکھ روپئی توانا کننگا، ہراڑان دا مد اٹی 3 لکھ 39 ہزار روپئی توئی ودکی مریک۔ پوسکن آ پیکیج نا رداٹ سپریم کورٹ نا جج آتا پنشن پیکج اٹی ہم اہم بدلی کننگانے۔ پنشن تون گنڈوک اسہ ٹک اسے ٹی 70 سال انا عمر نا کچ ءِ ودفسا 75 سال وخت اس کہ تعلقدار ارٹمیکو ٹک اٹی 85 سال انا کچ ءِ ودفسا 90 سال کننگانے۔ داڑان بیدس سپریم کورٹ نا جج آتیکن تو انا اسہ لکھ 50 ہزار روپئی میڈیکل الاؤنس ہم پن کننگانے۔ پوسکن آ منظوری نا رداٹ جج آتے تنخواہ و الاؤنس اٹی ودکی نا مالی فائدہ مروک آ تاریخ 10 دسمبر 2025ء آن دوئی مریک‘ وخت اس کہ گدرینگوک آ مُدا نا واجبات آک ہم تننگرہ۔