شکبری نا گنجائشت اف، سعودی مسلم دنیا نا بنجا ءِ، ترجمان پاک فوج

اسلام آباد (مانیٹرنگ ڈیسک) پاک فوج نا ترجمان میجر جنرل بابر افتخار پارینے کہ پاکستان اسٹاک ایکسچینج آ بے سہب جلہو و دہشت گرد آتیکن منی لانڈرنگ اٹ بھارت نا دو ارے۔ بھارت نا ہمسایہ غاتا برخلاف جارحانہ عزائم علاقائی امن کن خطرہ سے۔ ڈائریکٹر جنرل انٹرسروسز پبلک ریلیشنز (ڈی جی آئی ایس پی آر) میجر جنرل بابر افتخار نا پریس بریفنگ اٹ پاننگ ئس کہ پاکستان و سعودی عرب نا تعلقداری گچین ءِ او جوان مریک، کس اسے مسلم دنیا ٹی سعودی عرب نا بنجائی آ ہچ ءُ شک اس بایدے مف، دنیا اسہ ایلو گنڈنگ انگ ءِ۔ ہچ ءُ پُوسکن ءُ بلاک اسے ٹی اواری نا ہچ ءُ گمان اس اف۔ ڈی جی آئی ایس پی آر میجر جنرل بابر افتخار پارینے کہ کلبھوشن جادھو نا معاملہ غا ہچ ءُ ڈیل اس مفک، کلبھوشن اسہ دہشتگرد اسے ہرا پاکستانی تا دتر تے وہفینے۔ ڈی جی آئی ایس پی آر پارینے کہ کلبھوشن جادھو ءِ قونصلر رسائی بین الاقوامی تقاضہ غاتے پورو کننگ کن تننگانے۔ او پارینے کہ بھارت ڈیہہ ءِ عدم استحکام نا کنڈ آ دکہ تننگ اٹی ءِ، وخت انا وخت اس دا لاپرواہی مچ آ ڈیہ ءِ تینا پلویڑ اٹی اتیک۔ او پارینے کہ مقبوضہ کشمیر اٹ آبادی نا تناسب ءِ بدل کننگ اٹی ءِ۔ اقوام متحدہ نا جنگ بندی نا اپیل آن پد بھارت کنٹرول لائن آ بزدلانہ ءُ کارروائی تے برجا تخے، 22جولائی آ انٹرنیشنل میڈیا کنٹرول لائن نا دورہ ءِ کرے، ننتون ڈکھنگ کن ہچ ءُ گڑاس اف ہندا سوب آن ہر وخت یو این تون اور ہر اسٹ ءِ آزاد کشمیر آ ہننگ نا آجوئی تسن۔ ترجمان پاک فوج پارینے کہ بھارت تون 5 رافیل طیارہ بسنے یا 500، پاکستان ءِ ہچ ءُ فکر اس اف، پاکستان تیار ءِ او پاکستان مقابلہ کرے نشان تس۔ ڈی جی آئی ایس پی آر میجر جنرل بابر افتخار پارینے کہ پاکستان ءِ سما ءِ خلیس انت اسے او داڑتون امر مون تروئی ءِ۔ پاکستان پُوسکن آ سیاسی نقشہ ٹی جونا گڑھ آ تینا دعوی ءِ ظاہر کرسا ارادہ ظاہر کرینے او داسہ اودے مونی دینہ کانہ۔ ڈی جی آئی ایس پی آر دہشت گرد احسان اللہ احسان نا مبینہ آڈیو ٹیپ اٹ کروک آ دعویٰ تے بے بنداو گوندسا رد کرینے۔ میجر جنرل بابر افتخار پارینے کہ احسان اللہ احسان ءِ اسہ آپریشن اسے ٹی کاریم اٹ ایسنہ ہمو وخت آ نرہنگ اٹ سرسہب مس۔ او پارینے کہ احسان اللہ احسان نا نرہنگ نا زموار آتا برخلاف جوان کارروائی کننگ انگ ءِ۔ احسان اللہ احسان آن ملوک آ معلومداری آن دہشتگردی نا برخلاف بھاز فائدہ مسنے۔ ڈی جی آئی ایس پی آر پارینے کہ پاک فوج اُلس تون ملسا مادر وطن نا رکھ اکن تیار ءِ، دشمن قوت آتا فوج پاکستان و اُلس نا نیام اٹ خلیج ودی کننگ نا کوشست آتے سرسہب مننگ کن ہلیپنہ۔ او مستی پارینے کہ اوغانستان و ایران نا سیم اتون فینسنگ نا کاریم برجا ءِ، پاک اوغان سیم آ 1700 کلومیٹر آ فینسنگ نا کاریم ءِ پورو کننگانے۔ قطبی وزیرستان اٹ بارڈر فینسنگ اٹی 70آئی ای ڈیز بے سہب کننگانے۔ میجر جنرل بابر افتخار پارینے کہ پاکستانی میڈیا دہشتگردی نا برخلاف جنگ اٹ اہم ءُ کڑد اس ادا کرینے، پاکستانی میڈیا دہشتگرد آتا بیانیہ ءِ سرسہبی ٹی بے سہب کرینے۔ او پارینے کہ پاکستان و پاکستان نا اُلس ءِ سعودی عرب تون تعلقداری آ فخر ءِ، سعودی عرب تون تعلقداری بھاز گچین ءِ او سلک، کس اسے ہم مسلم دنیا ٹی سعودی عرب نا بنجائی آ ہچ ءُ شک اس بایدے مف۔ ڈی جی آئی ایس پی آر پارینے کہ آرمی چیف نا دورہ سعودی عرب مالو آن شیڈول ئس۔