جمعہ نادے 73می یوم آزادی لمہ وطن ءِ عظیم آن عظیم کننگ نا عزم اتون تننگک

0

Get real time updates directly on you device, subscribe now.

اسلام آباد (اے پی پی) قوم 73 می یوم آزادی ءِ جمعہ نادے آ دا عزم اتون اڈ ایتک کہ بابائے قوم انا افکار و مصور پاکستان نا تغ تا تعبیر پاکستان ءِ دنیا نا نقشہ غا اسہ باوقار و قائدانہ کڑد اس تخوک عظیم آن عظیم تر ملک اس کینہ، دے انا بناءِ مسیت آتیٹی پاکستان نا سوگوی و شونداری و شونہالی نا خصوصی دعاتے اٹ کننگک۔ بنجائی دارالحکومت اسلام آباد اٹی 31 وخت اس کہ صوبائی دارالحکومت آتیٹی 21، 21 توپ آتا سلامی ءِ تننگک۔ مچ آ ملک اٹی سرکاری ماڑی تیا بتی لگفنگانے، اُراتیا پاکستان نا سوز ہلالی قومی بیرک ءِ چست کننگانے و گلی و بازار تے بیرفنگانے۔ پارلیمنٹ ہاوس اٹی زیبدار گروشک تروک بتیک ڈی چوک انا رونق ءِ ودفینو۔ قائد نا مزار آ گارڈ آتا بدلی نا دود مریک وخت اس کہ اہم حکومتی شخصیت آک پھل آتا چادراس شاغرہ۔ چندی ادارہ غاتیٹی دود آتیٹی ملی نغمہ و پاکستان نا جوڑ مننگ نا جہد نا بابتءِ خصوصی مون آ تخنگک۔ اخبار آتیٹی خصوصی ایڈیشن و ٹیلی ویڑن چینل تیا خصوصی نشریات مریک۔ دادے انا رداٹ صدر مملکت، وزیراعظم و اہم حکومتی و سیاسی سرکڑدہ غاتا خصوصی کلہو جاری مریک۔ دادے آ تحریک آزادی کشمیر نا روح رواں بطل حریت سید علی شاہ گیلانی ءِ نشان پاکستان تننگک۔ داکان بیدس ہم نمان خذمت آتیا عسکری و چندی بشخ آتیٹی نمان کڑد ادا کروک آتے ایوارڈ تننگک۔ نماز جمعہ نا مچی تیٹی ہم وطن نا سلامتی و ششونہالی کن خصوصی دعا کننگک۔ کشمیر نا آجوئی کن ہم خصوصی دعا کننگک۔ سرکاری ٹیلی ویڑن آ قیام پاکستان نا بابت دستاویزی پروگرام نشر کننگک۔ چندی ملک آتیٹی پاکستان نا سفارت خانہ و ہائی کمیشن تیٹی ہم یوم آزادی نا شان و شرف اٹ دود مریک۔ داکان بیدس بھارتی غیر کانودی مقبوضہ کشمیر اٹی آل پارٹیز حریت کانفرنس و ایلو سیاسی جماعت آک اینو 14 اگستءِ پاکستان نا یوم آزادی یوم تشکر نا وڑاٹ اڈتننگ نا پڑو ءِ کرینو وخت اس کہ پگہ 15 اگست ءِ بھارت نا یوم آزادی ءِ تہاردے انا وڑاٹ اڈتننگک۔

Get real time updates directly on you device, subscribe now.

Leave A Reply

Your email address will not be published.