ریلوائی ایم ایل ون آن 90 درسد پاکستانی تے روزگار ملک، سی پیک اتھارٹی

اسلام آباد (اے پی پی) سی پیک نا رداٹ 7.2 ارب ڈالر نا خڑچ آن تفوک آ مین لین۔ ریلوائی ایم ایل ون آن 90 درسد آن زیات پاکستانی تے روزگار نا وارخواہی ودی مریک۔ سی پیک اتھارٹی کمامدارآتارداٹ مین لین ون ٹریک آن ریلوائی شکست آتا مون ءِ توننگ و ہزار آ ورناتیکن روزگار نا وارخواہی ودی کننگ اٹ کمک رسینگک۔ دافری ٹریک کراسنگ مریک ہراڑان کراچی آن لاہور اسکان نا سفری وخت و پاس اٹ ہفت گھنٹہ نا کمتی بریک وخت اس کہ راولپنڈی آن لاہور نا سفر بیرہ اِرا گھنٹہ ٹی مریک۔ ساڑی ٹی وزیراعظم نا خصوصی کمکار حوالکاری وچیئرمین سی پیک اتھارٹی لیفٹیننٹ جنرل (ر) عاصم سلیم باجوہ راجی رابطہ نا ویب سائٹ آ تینا ٹویٹ اٹی پاریسس کہ ایم ایل ون ڈٹ انا خڑچ 7 ارب 20 کروڑ ڈالر ءِ۔ خصوصی کمکار نا پاننگ ئس کہ پشاور آن کراچی اسکان ڈٹ اٹی 1872 کلومیٹر مرغن آ ریلوائی ٹریک نا اپ گریڈیشن اوار ءِ و پشاور آن کراچی اسکان ریلوائی ٹریک ءِ دورویہ کننگ ہم ڈٹ انا بشخ ءِ۔ ایم ایل ون آن ریل گاڈیک یک سد و شست کلومیٹر فی گھنٹہ نا رفتار آن چلینگرہ۔ ہرافتے پین ودفسا دوسد کلومیٹر فی گھنٹہ کننگ مریک۔ ایم ایل ون اسہ انقلابی ءُ ڈٹ اسے ہرادے حکومت پورو کیک و داڑان پاکستان ریلوائی نا مچ آ پنجر گچین مریک، ارب آ ڈالر مالیت نا دا ڈٹ چین نا کمک اٹ پنچ آن ہشت سال انا مد اٹ پورو مریک۔