لاک ڈاﺅن درمان اس اف، بیرہ رکھی گام گیج اسے، وزیراعظم

اسلام آباد :  وزیراعظم عمران خان پارینے کہ زرگزران نا بحال مننگ اسکان غریب و شیفکو تپہ نا ویل آک ودرہ، الس نا زند ءِ سٹی آ گڑتی تیٹی شاغنگ آن بیدس ہر ہمو بشخ اٹی آسراتی تے فراوان کینہ، ہراڑتون غریب وسفید پوش آ بندغ آتا روزگار گنڈوک ءِ۔ اسلام آباد اٹی وزیراعظم نا کماشی ٹی کورونا دین انا حالیت آ دیوان اس مس۔ خصوصی جانجوڑی کمکار ظفر مرزا مچ آ ملک اٹی زہمی تا کچ، پک انگا کیس، جغرافیائی تالانی تون اوار ٹیسٹنگ نا کچ و کیس آتیٹی ودکی نا تناسب نا رد اٹ سرجم حوال تس۔ دا وخت آ وزیراعظم نا پاننگ ئس کہ الس ءِ لاک ڈاو¿ن تون اوار بین و غریبی نا گڑتی ہم مون تروک ءِ۔ ننے بین و کورونا نا جہانی دین انا مون ءِ توننگ کن گام گیج آتا نیام اٹ بریبری اس اتنگ نا گرج ءِ۔ وزیراعظم پارے کہ ننا آبادی ءِ ہراخس خلیس لاک ڈاﺅن آن ارے، اوکان کیہی ہموخس زیات بین و غریبی آن ارے۔ لاک ڈاﺅن کورونا نا درمان اف، بلکن دا وختی وَڑ انا رکھی گام گیج اسے۔ او پارت کرے کہ ساڑی حالیت اٹی پولیس الس آ سختی نا جاگہ غا سنگتی کیر۔ دا وخت آ وزیرِ اعلیٰ پنجاب عثمان بزدار و وزیر اعلیٰ خیبرپختونخوا محمود خان اس تا پاننگ ئس کہ ٹرانسپورٹ نا بند مننگ آن لس بندغ نا روزگار و سرجز آک بھاز زہمی مسنو۔ دیوان اٹی آٹو موبائل سیکٹر نا خواست آتے ہم وزیراعظم ءِ تننگا۔ وزیراعظم وزیر صنعت ءِ پارت کرے کہ دا خواست آتا جاچ ءِ ہلے، تاکہ دا رد اٹ فیصلہ اس کننگ مرے۔