بلوچستان: بروک آ پی ایس ڈی پی ٹی جانجوڑی بشخ اکن بھلو بجٹ اس تخنگ نا فیصلہ

کوئٹہ : وزیراعلیٰ بلوچستان جام کمال خان نا کماشی ٹی پنچ شنبے نا دے ڈویژنل کمشنر آتا ویڈیو لنک کانفرنس اڈ ہلک، پار لیمانی جانجوڑی سیکریٹری ڈاکٹر ربابہ بلیدی، جانجوڑی سیکرٹری دوستین جمالدینی و انچارج صوبائی کنٹرول اینڈ آپریشن سینٹر عمران گچکی اسک ہم کانفرنس اٹ ساڑی ئسر۔ کانفرنس اٹی کورونا وائرس نا حالیت و باندات، احساس پروگرام آ عملدرآمد راشن نا بشخنگ و ٹڈی دل نا وننگ کن برجا گام گیج آتا جاچ ہلنگا۔ ڈویژنل کمشنر آتا کنڈ آن تعلقدار آتا کنڈ آن تعلقدار باندات و کورونا وائرس نا بابت گرج آتا بابت بریفنگ تننگا۔ کانفرنس ٹی ضلع و یونین کونسل آتا کہول آ کورونا وائرس آن زہمی بندغ آت اسکریننگ، ٹریکنگ و ٹریسنگ نا میکنزم ءِ سوگو کننگ نا فیصلہ کننگا۔ وخت اس کہ وزیراعلیٰ غٹ ڈویژن آتا کہول آ اسسٹنٹ کمشنر آتا سروکی ٹی جوڑ سرولنس کمیٹی تے فعال کننگ نا پارت کرے۔ کانفرنس اٹی روچہ نا گڈیکو عشرہ ٹی اعتکاف غا تولنگ نا ایس او پی تیا عملدرآمد و مسیت آتیٹی جراثیم کش دارو نا سپرے ءِ پک کننگ نا فیصلہ کننگا، وخت اس کہ وزیراعلیٰ پارت کرے کہ کمشنر آک عئید نماز نا وخت آ ایس او پی تا تیاری و عملدرآمد کن سلاہ سوج ایتر۔ وزیراعلیٰ پارت کرے کہ پولیس امن و ایمنی آن بیدس کورونا وائرس نا بابت باندات ہم ضلعی انتظامیہ تون پبی کمک کے۔ وزیراعلیٰ پارے کہ کمشنر آک ڈینگی و ملیریا تا بابت ہم الرٹ مریر، و اوفتا تالانی ءِ توننگ کن گام گیج کیر۔ وزیراعلیٰ پارے کہ ڈبلیو ایچ او نا رد اٹ کورونا وائرس نا زہم بھلو وخت اسسکان مننگ کیک، ہرانا مون ءِ توننگ کن مریس مُدی ڈٹ بندی المی ءِ۔ دا حالیت ءِ مون آ تخسا غٹ کمشنر آک تینا ڈویژن تیٹی جانجوڑی نا گرج آتا رد اٹ شونداری ڈٹ ٹہیفر۔ ہرافتے بروک آ مالی سال اٹی پی ایس ڈی پی ٹی اوار کننگک۔ وزیراعلیٰ پارت کرے غٹ ڈپٹی کمشنر آک کمپنی تا کنڈ آن تینا ضلع نا سی ایس آر نا مد اٹ رسینگوک فنڈ آتے جانجوڑی نا بشخ آ خڑچ کیر۔ سمارٹ لاک ڈاو¿ن نا خلاف ورزی کن اِلنگپ، ماسک بیننگ ءِ پک کننگے و الس اٹی رکھی گام گیج نا شعور تالان کننگے۔ ڈپٹی کمشر آک بھلا نجی ادارہ و کثیرالقومی کمپنی تتون رابطہ کرسا کورونا وائرس نا مون ءِ توننگ کن گام گیج آتیٹی اوفتیان کمک ہلیر، و تفتان اٹی پری فیب ہنکین و ایلو آسراتی تیٹی ودکی کننگے۔ وزیراعلیٰ کورونا وائرس نا رکھی گام گیج اونا تالانی ءِ توننگ، راشن بشخنگ، احساس پروگرام آ عملدرآمد و ملخ آتا توننگ کن کمشنر آتا و ضلعی انتظامیہ نا کارکڑد نا ستا ءِ کرے۔ دا وخت آ جانجوڑی سیکرٹری حوال تس کہ غٹ ضلع غاتے گرج انا رد اٹ وی ٹی ایم کٹ فراوان کننگانے۔ ولے ضلع غاتا کنڈ آن ٹیسٹ انا وڑک راہی کننگ پننگ ءِ۔ او پارے کہ زُوت خضدار اٹی بی ایس ایل گریڈ 2 ٹیسٹنگ لیبارٹری آ کاریم نا بنا کننگک۔