بنجا و ہر چار صوبہ غاتیٹی میٹرک و انٹر نا طالب علم آتے پاس کننگ نا پڑو

اسلام آباد (مانیٹرنگ ڈیسک) بنجائی وزیرتعلیم شفقت محمود پارینے کہ مچ آ ملک اٹ نہمیکو جماعت آن دہمیکو جماعت اٹ و یانزدہ میکو آن دوانزدہ می جماعت اٹ ہنوک آتے کمبائن پیپر ہم تروئی تمپک‘ او بروک آسال بیرہ دہمیکو و دوانزادہ میکو جماعت نا امتحان ایترہ۔ اسلام آباد اٹ پریس کانفرنس کرسا شفقت محمود پارے کہ قومی رابطہ کمیٹی غٹ تعلیمی ادارہ غاتے 15 جولائی اسکان بند کننگ نافیصلہ کریسس و نہمی‘ دہمی وانٹر نا امتحان تا مفننگ نا پڑو کریسس۔او پارے کہ اینو کل صوبہ غاتا صوبائی وزیرتعلیم تا دیوان اڈ ہلک و بنداوی فیصلہ کننگا‘ 40 لکھ چناتے نُہہ‘ دَہ‘ یانزدہ و دوانزادہ نا امتحان تروئی ئس‘ چناتا جانجوڑی نا رد اٹ ہندن ءُ فارمولہ اس جوڑ کروئی ئس کہ سال ہم زیان مف۔ بنجائی وزیر تعلیم پارے کہ اینو اہم ءُ فیصلہ کننگانے ہرافتا رد اٹ نُہہ ویانزدہ ناامتحانک مفسہ‘ ہرافتتون نُہہ و یانزدہ نا نتیجہ ارے اوفتے دَہ و دوانزدہ می جماعت اٹ پروموٹ کننگا‘ او اپارے کہ دہ و دوانزادہ ٹی پروموٹ مروک آک بیرہ دَہ و دوانزادہ جماعت نا امتحان ایترہ‘ جاچ ہلنگ نا سما تمانے کہ نُہہ انا مون اٹ دہمیکو جماعت نا نتیجہ جوان مریک‘۔4 کیٹیگری نا طالب علم آتیان ستمبر، نومبر نا نیام اٹ امتحان ہلنگ مریک۔ شفقت محمود پارے کہ اسہ کیٹیگری ٹی ہمو طالب علم آک مریرہ ہرا یانزدہ می جماعت نا نمبر آتیان خوش افس و دوانزدہ ٹی گچینی اتنگ خواہسرہ‘ ارٹمیکو کیٹیگری ٹی ہمو طالب علم آک ہرا دا سال اسیجا امتحان تننگ خواہسرہ‘ مسٹمیکو کیٹیگری ٹی ہمو طالب علم آک ءُ ہرافک منہ مضمون اٹ گچینی کن امتحان تننگ خواہسرہ و چارمیکو کیٹیگری ٹی ہم طالب علم آک ءُ ہرافک 40 درسَد آن زیات مضمون تے ٹی فیل ءُ۔ یانزدہ نا نتیجہ غان اس جم مفروک طالب علم آک ستمبر، نومبر اٹ اسپیشل امتحان تننگ کیرہ ہرا کمپوزٹ امتحان تسرہ و یانزدہ نا امتحان الو او ستمبر، نومبر اٹ امتحان تننگ کیرہ۔او پارے کہ ہرا طالب علم آک منہ مضمون اٹ پاس مسر او ہم ستمبر، نومبر اٹ امتحان تننگ کیرہ‘ ہرا طالب علم آک 40 درسَد آن زیات مضمون تے ٹی فیصل مسر او ہم ستمبر و نومبر اٹ امتحان تننگ کیرہ‘ ۔ وزیر تعلیم پارے کہ اسپیشل امتحان تننگ نا استخواہی تخوک آک یکم جولائی اسکان تینا تینا بورڈ آتے معلومدار کیر۔ بنجائی وزیر تعلیم شفقت محمود پارے کہ ہرا طالب علم آک نُہہ‘ دَہ و یانزدہ می جماعت اٹی ءُ او دا سال امتحان تفسہ‘ ہرا طالب علم آک نہہ و یانزدہ نا امتحان تسنو اوفتے پروموٹ کننگانے‘ ہرافتے دَہ ویانزدہ می جماعت اٹ پروموٹ کننگک اوفتے مسہ درسَد ودکی نمبر تننگک۔