مردم شماری نا بابت الس نا بے چکاری گڑتی نا ہیت اسے، بی این پی

نوشکے : بی این پی نوشکے نا ضلعی کابینہ نا دیوان ضلعی صدر حاجی میر بہادر خان مینگل نا کماشی ٹی اڈ ہلک۔ دیوان نا خاص انگا مہمان بلوچستان نیشنل پارٹی نا بنجائی ایگزیکٹیو کمیٹی نا باسک و ایم پی اے نوشکے میر محمد رحیم خان مینگل ئس۔ دیوان اٹ بلدیاتی گچین کاری خانہ و مردم شماری کبینی، نوشکے ٹی دزی، داڑیلی امن و ایمنی و تنظیمی ویل آتون اوار ایلو ایجنڈا آ ہیت وگپ کننگا۔ دیوان نا بنا تلاوت کلام پاک آن مس۔ دیوان اٹ سی ای سی نا باسک میر خورشید جمالدینی نا باتی و بی این پی نوشکے نا ضلعی فنانس سیکرٹری سردار عزیز آحمد بادینی نا باوہ نا کزیت آ ہڑزخواہی کننگا۔ دیوان اٹ ضلعی صدر حاجی میر بہادر خان مینگل بلدیاتی گچین کاری تیٹی پارٹی پوزیشن نا بابت اٹ پورو بریفننگ تس۔ دیوان اٹ پارٹی نا جوان حکمت عملی و سرسہبی آ اُست خواہی نا درشانی ءِ کرسا پارینے کہ ہر قوم انا وجود اونا آبادی تون گنڈوک ءِ۔ و ہر وڑ نا شونداری کاریم کن فنڈ آتا بشخ وپانٹ، بنداوی گرج آک زند انا ڈٹ بندی، تعلیمی ادارہ و تعلیمی نشستیں صحت انفرا اسٹرکچر روزگار نا فراوانی آبادی نا بنداو آ کننگرہ۔ وخت اس کہ پوسکن آ تحصیل و ضلع غاک مردم شماری نا بنداو آ جوڑ مریرہ ولے ہر وخت خانہ شماری و مردم شماری نا کاریم ءِ گڑاس مفاد نا تابع جوڑ کرسا چنکو بھلو قوم و صوبہ نا بنداو آ استحصالی عمل ءِ دوام تننگ کن نتیجہ غاتے تینا خواہش آتے جوڑ کننگ کن مردم شماری نا کاریم ءِ جتا کننگک۔

(آن لائن)