بلوچستان، پر تیان دنیا اِلوک آتا کچ 278 مس

کوئٹہ: بلوچستان اٹ پِر ونوکاپ نا بھسکاریک برجاءُ‘ دنیا ءِ الوک آتا کچ 278 مس‘ بلوچستان اٹ 24 گھنٹہ ٹی نوکاپ نا سوب آن مروک شکست آتے ٹی پین 8 زوال نا پک مننگ آن پد صوبہ ٹی زوال مروک آتا کچ 278 مس۔ پرووینشل ڈیزاسٹر مینجمنٹ اتھارٹی(پی ڈی ایم اے) نا جاری کروک رپورٹ نا رد اٹ تدوک آ 24 گھنٹہ ٹی نوکاپ نا سوب آن مروک شکست آتے ٹی پین 8 زوال رپورٹ مسر۔6 نرینہ و اِرا نیاڑی نا زوال مننگ نا رپورٹ ضلع جھل مگسی آن مسنے۔ بلوچستان اٹ یکم جون آن داوخت اسکان زوال مروک آتا کچ 278 مسنے زوال مروک آتے ٹی 132 نرینہ‘63 نیاڑی و 83چنا اوار ءُ۔ پروانشل ڈیزاسٹر مینجمنٹ اتھارٹی بلوچستان (پی ڈی ایم اے) نا جاری کروک بیان اٹی پاننگانے کہ تدوک آ 24 گھنٹہ ٹی صوبہ نا گیشتر علاقہ غاتیٹی موسم باسن و جمری ئسک۔ پی ڈی ایم اے آرمی/ایف سی نا کمک اٹ آواران، سبی، نصیر آباد، جھل مگسی، کچھی، نوشکی، موسیٰ خیل، ڈیرہ بگٹی، صحبت پور و لسبیلہ ٹی ریلیف و ریسکیو آپریشن کننگ اٹی ءِ۔ یانزہمیکو ایمبیڈڈریلیف کیمپ نصیر آباد، جعفر آباد، جھل مگسی، کوئٹہ، ڈیرہ بگٹی، کوہلو و صحبت پور اٹی کاریم کننگ ءُ۔ دا کیمپ آتیٹی کمکی سرجزآتا سرجم آک دادو، آواران اٹی زہمی خاہو ت آتیٹی 55 راشن پیکیج بشخنگا۔ سول ہسپتال سبی ٹی داخل ناجوڑ آتے ہڑدے ئی بنداو آ دے اٹی اِرا وار تیار کن و خور تننگ انگ ءِ۔ نصیر آباد اٹی، راشن پیکیج 300 بندغ و 604 خاہوت آتیٹی بشخنگا و ایلو کمکی گڑا بشمول تمبو، کمبل، لحاف، دیر انا بوتل، تیار کن و خور، کشک راشن و اُرائی گڑا، کچھی ٹی 38 خاہوت آتیٹی تیار کن و خور/خشک راشن و بوتل نا دیر بشخنگا۔ جھل مگسی ٹی 55 راشن پیکیج بشخنگا و علاقہ ٹی دیر ساف کننگ نا آپریشن ہم کننگا۔ نوشکی ٹی 11 راشن پیکیج بشخنگا۔ بیلہ و کیبی ٹی 100 راشن پیکیج، 200 نت انا تھیلہ، 20 واٹر کولر و 20 کارٹن دیر انا بوتل بشخنگا۔ ایف سی ڈیرہ بگٹی ٹی 528 راشن پیکیج و تیار کن و خور، موسیٰ خیل اٹی 60 راشن پیکیج، 40 نت انا تھیلہ، پچ جوس و پال انا کاٹن بشخار۔ سول منشاکار آک گوٹھ کنڈی نیمی، لسبیلہ ٹی 100 راشن بیگ، پچ و بوٹ بشخار۔ پی ڈی ایم اے کوئٹہ و قلعہ سیف اللہ ٹی 175 تمبو، 150 فوڈ پیکیج، مچھر دانی، پلاسٹک نا چٹائی، بالٹی، جیری کین و 250 کمبل بشخا۔ تدوک آ 24 گھنٹہ ٹی پی ڈی ایم اے و آرمی، ایف سی نا کنڈآں لوٹی، زین، کلی دامن، آدم پور، پروم، مند، میرانی، بالنگور، ڈی ایم جے، حبیب کوٹ گنڈکا، جھل مگسی، اوستہ محمد اٹی کل 83 فری میڈیکل کیمپ خلنگا ہراڑے ہزار آ ناجوڑ آتا درمان ءِ کننگا۔10، این۔ 40، این۔ 70 و این۔ 85 شاہراہ تے ملنگا نے۔ این۔ 25 لنڈاپول ڈائیورژن نا کمک اٹ غٹ ٹریفک کن ملوک ءِ۔ این۔ 50 جزوی وڑاٹ ٹریفک کن ملوک ءِ ہرانا سنگل کیریج وے پول سگو ٹی بناکننگانے۔