وارا بندی نا رد اٹ شیفکو شاخ تے ٹی دیر فراوان کننگ انگ ئِ‘ ایکسین پٹ فیڈر کینال

نصیر آباد (خ ن) ایکسین پٹ فیڈر کینال نثار احمد مغیری پارینے کہ پٹ فیڈر کینال اٹ دیر بے سلنگ آن وہنگ اٹی ئِ و وارا بندی نا رد اٹ شیفکو شاخ تے ٹی دیر فراوان کننگ انگ ئِ‘ مستین آن چَپ دا وار خریف نا سیزن اٹ دیر انا مننگ ئِ پک کننگانے‘ اوچ لنک کینال اونا درکار گرج انا کچ آ دیر تننگ انگ ئِ‘ مین گیٹ و ایلو کرپشن نا بابت خلوک دوبہ غاک راست افس انتئے کہ غٹ کانودی خواست آتے پورو کرسا کینال تا بھل سفائی وایلو کاریم تے کننگ انگ ئِ‘ دا خیال آتا درشانی ئِ او کشاری دیر بشخنگ ناجاچ ئِ ہلنگ ناوخت آ افسر آتون ہیت وگپ کرسا کرے۔دا وخت آ ایس ڈی او ہیڈ کوارٹر خادم حسین لہڑی، داروغہ لونگ خان چانڈیو وایلو کارندہ غاک ہم ساڑی ئسر۔ ایکسین نثار احمد مغیری پارے کہ شیفکو شاخ تے وارا بندی نا رد اٹ دیر تننگ انگ ئِ‘ نن ٹیل اسکان دیر سر کننگ کن کوشست کننگ اٹی ان ہراڑکن ہر وڑ انا گام گیج کننگانے۔ دیر دزی کننگ ئِ توننگ و دیرئِ انصاف اٹ بشخنگ کن محکمہ ایریگیشن ہندی انتظامیہ تون کمک کننگ اٹی ئِ۔