پاکستان اسکواش فیڈریشن نا ٹاپ 30 سینئر و جونیئر گوازی گرتے ٹریننگ تننگ نا فیصلہ

اسلام آباد (مانیٹرنگ ڈیسک) پاکستان اسکواش فیڈریشن ٹاپ 30 سینئر وجونیئر قومی گوازی گرتے ٹریننگ تننگ نا فیصلہ کرینے۔ قومی گوازی گرتا ٹریننگ حکومت نا موکل تون تفوک ءِ، موکل رسینگ انگ آن پد گوازی گرتے حکومت نا کنڈآن ایس او پیز نا رداٹ فزیکل فٹنس ٹریننگ تننگک۔ پاکستان سکواش فیڈریشن نا نائب صدر و مسکوہی جہانی چمپئن قمر مان تدوک آ دے تینا بیان اسے ٹی پارینے کہ فیڈریشن قومی گوازی گرتے فزیکل فٹنس پروگرام جوڑ کننگ نا فیصلہ کرینے۔ ہرانا رداٹ ٹاپ 10 سینئر و ٹاپ 20 جونیئر گوازی گرتے دا پروگرام نا رداٹ ٹریننگ کن دعوت تننگک۔ او پارینے کہ قومی گوازی گرتا پاکستان اسپورٹس کمپلیکس اسلام آباد اٹ ٹریننگ حکومت نا موکل تون تفوک ءِ۔ حکومت نا کنڈآن موکل رسینگ انگ آن پد ایس او پیز آتا رداٹ ٹریننگ تننگک۔ او پارینے کہ جہانی دَین کورونا وائرس نا سوب آن نہ بیرہ پاکستان وخت اس کہ مچ آ دنیا ٹی تدوک آ چار تو آن جہانی مقابلہ غاک معطل ءُ او پروفیشنل اسکواش ایسوسی ایشن و انٹرنیشنل اسکواش فیڈریشن 6 تُو اسکان کل اسکواش نا مقابلہ غاک معطل کننگانو۔ قمر زمان پارینے کہ کورونا وائرس نا سوب آن نہ بیرہ پاکستان وخت اس کہ مچ آ دنیا ٹی کل گوازیک خاص کر اسکواش گوازی ءِ بھاز نسخان رسینگانے۔ او پارینے کہ اسکواش ہندن ءُ گوازی اسے ہراٹی گوازی گرتا فزیکل فٹنس ءِ اسہ وڑ توننگ بھاز المی مریک او ہر گوازی گر ءِ کم از کم ہڑدے 6 گھنٹہ پریکٹس المی ءِ۔ او پارینے کہ کورونا وائرس اٹی گوازی گر تینا فٹنس لیول ءِ اسہ وڑ توننگ کن اسٹ اسٹ آ پریکٹس کننگ اٹی ءُ وخت اس کہ داسہ فیڈریشن پنی و لائخ آ سینئر و جونیئر ٹاپ 30 گوازی گر ءِ فزیکل فٹنس پروگرام تننگ نا فیصلہ کرینن اومیت ءِ کہ حکومت نا کنڈآن زوت اس دا پروگرام نا موکل رسینگک۔