سوات اٹ فٹ بال نا ٹیلنٹ نا ہچ ءُ کمتی اس اف‘صدیق بنگش

اسلام آباد (مانیٹرنگ ڈیسک) اسوا فٹ بال اکیڈمی نا کوچ محمد صدیق بنگش پارینے کہ سوات اٹ فٹ بال نا ٹیلنٹ نا کمتی اف وخت اس کہ سوات ملک ءِ قومی و انٹرنیشنل کہول نا فٹ بالر تسنے۔ میڈیا تون ہیت وگپ کرسا او سوات اٹ فٹ بال نا بے کچ ٹیلنٹ ساڑی ءِ او وسیلہ غاتا کمتی نا سوب آن دا ٹیلنٹ نا زیان مننگ نا گمان ارے۔ او حکومت آن خواست کرینے کہ سوات نا فٹ بالر آتے زیات آن زیات آسراتی تننگے تانکہ سوات نا گوازی گر انٹرنیشنل کہول آ ملک انا پن ءِ روشنائی کننگ کیر۔ او پارینے کہ ملک اٹ کرونا وائرس نا دَین نا وخت آ گوازی گرک تینا فٹنس نا لیول ءِ جونا تخر تانکہ دَین نا ایسری تون گوازی گرتے ولدا جوان وڑاٹ گوازی نا پِڑ آ بروئی تمک۔ او پارینے کہ گوازی گرتے قوت مدافعت ءِ ودفنگ کن ہڑدے نا بنداو آ 30 آن 40 منٹ اسکان نا جتا جتا ورزش کروئی تمک، صدیق بنگش پارینے کہ حکومت نا کنڈآن گوازی تیا کورونا وائرس نا سوب آن پابندی خلنگ گوازی گر و اُلس نا حق اٹی اف۔ انتئے کہ حکومت ہر شاری نا رکھ انا زموارءِ، او پارینے کہ گوازی گر کورونا وائرس نا سوب آن لاک ڈاؤن اٹ تینا اُراتیٹی رہنگسا تینا فزیکل فٹنس آ زیات آن زیات سجفوئی تمک او عام ءُ بندغ اس ورزش ءِ تینا ہڑدے ئی کاریم تیٹی اوار کے۔ او پارینے کہ کورونا وائرس مچ آ دنیا ءِ تینا پلویڑ اٹی ہلکنے او داڑان بچنگ کن راجی فاصلہ غاتا خیال ءِ تخسا ملنگ آن ہم مر مننگے۔