پی ٹی آئی سروک منا کہ کس سازش کتنے، رانا ثناء اللہ

اسلام آباد : وزیرداخلہ رانا ثناء اللہ پی ٹی آئی ناچیئرمین عمران خان ءِ دروغ تڑ و مکار گوندساپارینے کہ پرسجو ناوخت آ پی ٹی آئی نا چیئرمین امنا کرے کہ اوڑتون کسفنگ نا سازش نا ہچ ءُ شاہدی اس اف‘ دیر کسفنگ نا سازش نا پارے دانا ہم اودے سما اف۔ فتنہ فوجی ادارہ نا برخلاف ہرا دوبہ غاتے خلک و گندہ ءُ ہیت کرے۔ 9 مئی آ تینٹ تینا عمل آن قوم ءِ تینے آن درستی راستی کرفے‘ 10لکھ ٹائیگر فورس جوڑ کننگ نا مسخت 9مئی کون آ واقعہ غاتا ڈٹ بندی ئس‘ حکومت وعسکری راہشون تا کنڈآن کلہو ایتوہ کہ کانود تینا کسر اٹ کاہک و دا فتنہ زوت تینا ایسر آسر مریک۔ اسلام آباد اٹ پریس کانفرنس کرسا وزیرداخلہ رانا ثناء اللہ پارے کہ عمران خان پرسجو ناوخت آ تینٹ امنا کرے کہ اخس کہ بیان ءُ اوفتا ہچ ءُ بیخ و شاہدی اس اف۔ فوجی ادارہ نابرخلاف عمران خان ہرا دوبہ غاتے خلک‘ ہراتم دابابت اوڑان پرسجو کننگا تو او کل ہیت آتے عمران خان منا‘ اسہ جاگہ اس ہم عمران خان دا پاتو کہ کنا آڈیو اف و دا بیان ہم تس کہ کن تون دا گڑاتا ہچ ءُ شاہدی اس اف۔ چیئرمین پی ٹی آئی آن سوج کننگا کہ اسہ بنجائی وزیر و فوج انا سینئر افسر نابرخلاف امر دوبہ خلکس تو او پارے کہ ہمو بیان نوشت اٹ اتنگا ہراڑا ای دستخط کریٹ‘دا پرسجوئی عمل آن پد اسہ سندی ءُ دستاویز اسے ہراڑا جے آئی ٹی چندی مقدمہ غاتے ٹی پرسجو کننگ اٹی ءِ و اوڑتون ہمو شاہدی ارے ہراڑا عمران خان تینٹ دستخط کرے و امنا کرے کہ او دوبہ خلکنے، دروغ تڑینے، و گندہ ءُ ہیت کرینے۔ رانا ثناء اللہ پارے کہ عمران خان دوبہ خلسا فوج انا بڑزکو افسر آتا پن تے ہسا تینا کسفنگ نا سازش نابابت ورنا چین ءِ خار تس‘پارٹی نا بندغ آتا ذہن تے خراب کرے۔ عمران خان امناکرے کہ اوڑتون کسفنگ نا سازش نا ہچ ءُ شاہدی اس اف۔ اوپارے کہ عمران نیازی ملک اٹ باقاعدہ وڑ اٹ سرکشی و بغاوت نا تیاری کریسس‘ دا (ٹائگر فورس) انا کمک اٹ ملک آ کوزہ کرسا تینا ایجنڈا ءِ نافذ کننگ نا کوشست کریکہ۔ رانا ثناء اللہ پارے کہ 9 مئی آ فوجی ملکیت آتے خاخر تننگ‘ ملک اٹ خاخر لگفنگ‘ سرکاری ونجی ملکیت آتے نسخان رسیفنگ آن پد عمران خان نا خیال ئس کہ السی ردعمل اونا حق اٹی مریک ولے اودے سرپرائز رسینگا و الس تینا شہید‘ اوفتا خاہوت و پاک فوج اتون سلیس۔ وزیر داخلہ پارے کہ 9 مئی نا واقعہ غاتا زموار منہ سَد بندغ نا برخلاف کانود پورو کاریم کننگ اٹی ءِ دا رد اٹ جے آئی ٹی ٹہیفنگانے و ہمو علاقہ غاتاجاست پاست مننگ اٹی ءِ ہراڑے فوجی ملکیت آک ءُ و دا بابت جم شاہدی ہم ارے۔ رانا ثناء اللہ پارے کہ ای اسہ وار ولدا حکومت و عسکری سرکڑدہ غاتا کنڈآن دا ہیت ءِ کننگ اٹی اٹ کہ ہرا بندغ آک زموار ءُ او سزا ناعمل آن المی گدرینگرہ و اوفتا برخلاف کانود تینا کسر اٹ کاہک ولے اسہ بے گناہ سے ہم سزا تننگپک۔

(آن لائن)