امریکہ تون جوہری معاہدہ نا بحالی کن مذاکرات برجا ءِ، ایران

تہران : ایران سلطنت عمان نا خیرخواہی ٹی امریکہ تون جوہری معاہدہ نا بحالی کن مذاکرات کننگ ءِ پک کرے‘ درملکی خبرایجنسی نا رد اٹ تہران اٹ ہفتہ وار بریفنگ ناوخت آ ایرانی وزارت خارجہ ناترجمان ناصر کنعانی پارے ک ایران جوہری معاہدہ بحالی نا رد اٹ عمانی کمامدار آتا کوشست آتا ستاءِ کیک‘ اوپارے کہ جوہری معاہدہ نا اولسر بحالی کن عمان نا خیرخواہی اٹ امریکہ تون بالواسطہ ہیت وگپ مننگ اٹی ءِ‘ اگہ امریکہ سنجیدگی نشان ایتے تو بندی تا بابت ہم امنائی کننگ مریک‘ او پارے کہ عمان ناکمک اٹ امریکی رکھ آتے چٹفنگ نابابت اسٹ ایلو آکلہو سر کننگانے‘ نن سفارتی عمل ءِ وخت اسہم توتنن ونئے ہیت آتے ڈکانن۔ امریکی محکمہ خارجہ ایران تون عمران اٹ مذاکرات آ داسکان ہچ ءُ بیان اس جاری کتنے‘ رپورٹ نارد اٹ ایرانی و امریکی کمامدار آک جتا جتا کمرہ غاتے ٹی تولوک ئسر و عمانی کمامدار آک ہڑتوم آ ڈل آتا کلہو تے اسٹ ایلو آ سر کننگ ناکاریم کریرہ‘ا یلو کنڈآ نشریاتی ادارہ نارپورٹ اٹ دا دعویٰ ہم کننگانے کہ ایران وامریکہ وختی معاہدہ اس کننگ ءُ ہرانا رد اٹ ایران آ خلوک رکھ آتے ٹی مچٹ نرمی کننگک و ایران یورینیم نا افزودگی ءِ کم کیک۔ دا بابت امریکہ و ایران نا نیام اٹ نیویارک اٹ مذاکرات ہم مسوسس ولے اوٹی ہچ ءُ بریک تھرو اس مننگ کتو۔

(آن لائن)