پیپلز پارٹی نا ڈَل انا ڈی سی سبی تون اوڑدہی
Get real time updates directly on you device, subscribe now.
کوئٹہ : پاکستان پیپلزپارٹی بلوچستان نا صوبائی صدرمیرحاجی علی مددجتک نا خصوصی پارت آ پاکستان پیپلزپارٹی سبی نا ضلعی صدرحاجی غلام رسول سیلاچی وڈویژونل سیکرٹری اطلاعات میرریحان بگٹی نا کماشی ٹی ڈل ڈپٹی کمشنرسبی تون اوڑدہی کرے۔ دا وخت آ ڈی سی سبی ڈاکٹریاسرخان بازئی پارے کہ مزورکارو دیہاڑی دار تپّہ نا راشن تننگ ءِ میرٹ آ پک کننگک‘ راجی و آسودہی تنظیم آک مزورکار و دیہاڑی دار تپّہ تے پیدوار کننگ کن ضلعی انتظامیہ تون کمک کیر‘ مشکل نا دا ساہت اٹ غریب ومسکین آتے نااومیت کپنہ‘ کورونا نا تالان مننگ ءِ توننگ کن لاک ڈاﺅن کننگ انگ ءِ‘ الس دفعہ 144 آ سختی اٹ عمل کے و تینا اُراتیان بے گرج آن پیش تمپ‘ او پارے کہ کورونا دَین نا اسٹ انگا درمان رکھی گام گیج آتیا عمل کننگ ءِ‘الس رکھی گام گیج آن بیدس کورونا غان بچنگ کپک‘ ماسک و دستانہ کاریم اٹ اتنگ آن بیدس سَفائی نا خاص خیال ءِ تخنگے انتئے کہ سَفائی نیمہ ایمان ءِ۔ داوخت آ پی پی پی نا ڈل تینا سلاہ تے ترسا پارے کہ مزورکار‘ دیہاڑی تپّہ تون اوار چنکا پوریاگر آتا ہم خیال ءِ تخنگے ہرا لاک ڈاﺅن آن برائے راست زہمی مننگ اٹی ءُ‘ سفیدپوش بندغ آتیکن اوفتا اُراتیا راشن سر کننگے۔ ڈپٹی کمشنرسبی سلاہ تے امنا کرے۔ پی پی پی سرکڑدہ غاک ڈی سی سبی ڈاکٹریاسرخان بازئی نا منت ءِ ہرفسا پاریر کہ ڈاکٹر یاسرخان بازئی لائخ وہمدرد ءُ انسان سے‘ دا وڑ انا جوان انگا افسر آتا بایدے قدر ءِ کننگے و اوفتا است بڈی ءِ کننگے۔
(آن لائن)