پٹ فیڈر کینال نا خراب انگا حالیت آ ہشت آن کس چکار کتنے، امین عمرانی
دا کینال نصیرآباد جعفر آباد صحبت پور و جھل مگسی نا زرگزرانی نا وَت ءِ ہراڑان داڑے لکھ آ ایکڑ ڈغارک آباد مریرہ ،مسکوہی صوبائی وزیر
Get real time updates directly on you device, subscribe now.
تمبو (آن لائن) پاکستان پیپلز پارٹی نا بنجائی راہشون مسکوہی صوبائی وزیر میر محمد امین عمرانی پارینے کہ پٹ فیڈر کینال نصیرآباد جعفر آباد صحبت پور و جھل مگسی نا زرگزرانی نا وَت ءِ ہراڑان داڑے لکھ آ ایکڑ ڈغارک آباد مریرہ و لکھ آ بندغ آتاروزگار ہندا کینال تون گنڈوک ءِ ولے است ہسونی نا ہیت دادے کہ 2012 غان پد آن ہلیس دا وخت اسکان داکینال ناخراب حالیت آ چکار کننگ تنے‘ کنڈ آتے ہلنگ و ڈی سلٹنگ نا پن آ ارب آ روپئی تا بجٹ ءِ کشسا بھاز کرپشن کننگا ولے پٹ فیڈر کینال نا حالیت اٹ ہچ جوانی بتنے۔ دا خیال آتا درشانی ءِ او صحافی تتون ہیت وگپ کرسا کرے۔ بابو محمد امین عمرانی دوبہ خلک کہ تدوک آدور اٹ پٹ فیڈر کینال اٹ ڈی سلٹنگ و کنڈ آتے پُر کننگ نا پن آ میگا کرپشن کننگا و وزیراعلیٰ ناکنڈآن جوڑ کروک انکوائری کمیٹی دا میگا کرپشن ءِ ہم کرے و رپورٹ ہم تننگا ولے زموار آتا برخلاف کارروائی کننگتو‘ ارب آروپئی تے خڑچ کننگ آن پد ہم نئے کَنڈ آک پُر مسر ونئے سہی وڑ اٹ ڈی سلٹنگ کننگا ہرانا سوب آن ہر سال لکھ آ ایکڑ ڈغارک غیر آباد سلرہ و زمیندارآک باہ انا باخو نا آہری مننگ ءُ‘ خاص وڑ اٹ خریف نا سیزن اٹ حکومتی نمائندہ غاک سرکاری مشینری ءِ کاریم اٹ اتسا تینا ڈغار تے آباد کیرہ و ٹیل انا زمیندار آک کنوئی آدیراکن سکرہ۔