حکومت نا مون آ 4 ٹک تخانن، 13 اپریل آ فیصلہ پک مریک، رحیم کاکڑ

کوئٹہ (آن لائن) مرکزی انجمن تاجران نا صدر عبدالرحیم کاکڑ پارینے کہ حکومت مذاکراتی کمیٹی نا مون آ 4ٹک تخانن‘ 13اپریل آ وزیراعلیٰ بلوچستان نا کماشی ٹی دیوان اٹ اہم ءُ فیصلہ کننگک۔ دا خیال آتا درشانی ءِ او صحافی تتون ہیت وگپ کرسا کرے۔ او پارے کہ 15اپریل آ ن کوئٹہ شار اٹ دکان تے ہر حال اٹ ملنہ‘ لاک ڈاﺅن نا سوب آن پویاگر تا مخ پنانے‘ نن تینا ملازم آتے تنخواہ و کرا تننگ کپننگ ان‘ پوریاگر تا دکان تے ٹی خاص وڑ اٹ ڈرائی فروٹ تون اوار منہ ہندن ءُ گڑا اریر ہرافتا خراب مننگ ناخلیس ارے‘ ہراناسوب آن لکھ آ روپئی تا نسخان مریک۔ مرکزی انجمن تاجران نا کابینہ تون اوار حکومتی مذاکراتی کمیٹی نا مون آ چار ٹک تخانن کہ دکاندار تے اسٹ آن اِرا لکھ مسہ قسط اٹ وام تننگے دے اٹ 10 آن 5بجہ اسکان دکان تے ملنگے یا یا 4گھنٹہ کن مرے‘ ہندا وڑ حکومت نا مون آ جتا جتا آپشن تخانن‘ اومیت ارے کہ دو شنبے نادے وزیراعلیٰ بلوچستان نا کماشی ٹی اڈ ہلوک دیوان اٹ ننا 4 ٹک آتون اوار ایلو ویل آتیاعملدرآمد کننگک۔