اوستہ پولیس نا کارروائی‘ سم کاری آن پد اسہ داڑیل اس دزگیر

اوستہ محمد (آن لائن) اوستہ پولیس نا کارروائی‘ سم کاری آن پد اسہ داڑیل اس دزگیر‘ اِرا موٹرسائیکل دوئی کننگا‘ دزی نا شمسی پلیٹ ہم دوئی‘ مسہ داڑیل نرنگ اٹ سرسہب مسر‘ ہلنگوک داڑیل آ مہالو آن ہم کیہی کیسک اریر‘بدنام داڑیل بلاول عرف بلو مگسی دزگیر مس۔ حوال نا رد اٹ ڈی ایس پی اکرم گشکوری و ایس ایچ او سٹی مقبول جمالی اسک میڈیا ءِ بریفنگ ترسا پاریر کہ سب انسپکٹر ریاض ڈاوچ بائی پاس آ گشت کریکہ کہ اِرا موٹرسائیکل آسوار چار بندغ ہرافتتون اسہ شمسی پلیٹ اس ہم ئس اوفتے سلنگ ناپاننگا ولے او نرار‘ پولیس اوفتے تُد تما‘ یعقوب محلہ ٹی پولیس و داڑیل آتا نیام اٹ سم کاری مس‘ سم کاری آن پد داڑیل آک اِرا موٹر سائیکل و شمسی پلیٹ ءِ الار نرار‘ ہندا وخت آ ایس ایچ مقبول جمالی پولیس کارندہ غاتون اوار سر مس‘ اسہ داڑیل بلاول عرف بلو مگسی ءِ دزگیر کریر وخت اس کہ ایلو مسہ داڑیل نرنگ اٹ سرسہب مسر۔ پولیس نا رد اٹ بلاول عرف بلو مگسی آ مہالو آن ہم کیہی کیس ارے‘ داڑیل آن پرسجو کننگ انگ ءِ‘ پین ہم بھاز آ پت آتا پاش مننگ نا گمان ارے۔