تاریخ اٹی اولیکو وار غریب الس ءِ مفت نُت رسینگک، شہباز شریف
ایلو صوبہ غاتے ہم دا پروگرام اٹ کمک فراوان کینہ، مفت نُت اسکیم اٹ اہلیت ءِ ایس ایم ایس نا کمک اٹ پک کننگ مریک
لاہور: وزیراعظم محمد شہباز شریف پارینے کہ ملکی تاریخ اٹی اولیکو وار نیزگار الس کن روچہ ٹی مفت نُت انا فراوانی نا پیکیج اس تیار کننگانے، مفت نُت انا بشخنگ ءِ شفاف وڑاٹ پک کننگے، روچہ ٹی مچ آ پنجاب نا اسہ کروڑ 58 لکھ اُراتے مفت نُت بشخنگک، نُت انا فراوانی ٹی دُزی ءِ توننگ کن پوسکن آ ٹیکنالوجی ءِ کاریم اٹ اتنگے۔ دوشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف نا کماشی ٹی روچہ پیکیج نا رداٹ مفت نُت انا فراوانی نا جاچ دیوان اس اڈ ہلک۔ دیوان اٹی حکومت پنجاب نا کنڈآن روچہ ٹی مفت نُت انا بشخنگ نا پروگرام آ سرجم حوال تننگا۔ دیوان اٹی نگران وزیراعلیٰ پنجاب سید محسن رضانقوی، سلاہکار وزیراعظم احمد چیمہ تعلقدار بڑزکو کمامدارآک بشخ ہلکر۔ اوپارے کہ مفت نُت انا آب آ ہچ ءُ سمجھوتہ اسے امنا کپنہ، مفت نُت اسکیم اٹی تینا اہلیت ءِ ایس ایم ایس نا کمک اٹ ہُننگ مریک۔ اوپارے کہ بنجائی حکومت ایلو صوبہ غاتے ہم دا پروگرام اٹ کمک فراوان کیک۔ وزیراعظم پارے کہ مفت نُت انا بشخنگ 25 شعبان آن 25 روچہ اسکان کننگک۔ اوپارت کرے کہ نُت انا بشخنگ ءِ 8 ہزار 5 سد یوٹیلیٹی اسٹور آتا کمک اٹ کننگے، السی آسراتی کن نت انا بشخنگ نا پین 20 ہزار پوائنٹ جوڑ کننگے۔
(اے پی پی)