عمران خان نا دزگیری کن آئین آ عمل مننگ ءِ، حکومت

اسلام آباد: بنجائی وزیر کانود و انصاف سینیٹر اعظم نذیر تارڑ پارینے کہ ادارہ غاک بے کنڈ ہلوک و آئین و کانود نا رداٹ تینا کاریم ءِ کیر، سیاسی سرکڑدہ غاتے دانا درک مرے کہ پولرائزیشن ملک اکن نسخان نا سوب ءِ۔ داخیال آتا درشانی ءِ او دوشنبے نادے آ نیشنل ویمن پولیس کانفرنس نا بنائی سیشن آن پد میڈیا تون گپ وتران کرسا کرے۔ بنجائی وزیر پارے کہ حکومت عمران خان نا دزگیری نا بابت آئین و کانود آ عمل کننگ ءِ۔ اسلام آباد پولیس عمران خان نا وارنٹ دزگیری نا باندات آ کانود آ عمل کرے و واک ءِ کاریم ا ٹ اتتو۔ عمران خان نا رویہ غیر زموارانہ ءِ۔ عمران خان اینو ہم عدالت اٹی حاضری آن استثنیٰ نا درخواست دائر کرینے۔ اوپارے کہ عمران خان مستین اٹی و داسہ ہم غٹ اکن اسہ وڑ نا انصاف نا خواست کیک ولے اوڑکن اوتینٹ ہم عملی بایدے شاہدی ایتے۔ او زمان پارک اٹی تولسا قوم انا چناتے لٹ کُننگ نا جاگہ غا تینٹ مون آ برے۔ اوپارے کہ وزیراعظم شہباز شریف ءِ دا کریڈٹ کاہک کہ او توشہ خانہ نا ریکارڈ ءِ پبلک کننگ نا فیصلہ کرے۔ دا باندات عدالت اٹی ئسک ولے ساڑی حکومت اپیل اٹ ہِننگ نا جاگہ غا توشہ خانہ نا ریکارڈ ءِ الس نا مون آ پیش کرے۔ وزیراعظم شہباز شریف نا پارت آ خواجہ آصف نا کماشی ٹی دا بابت کمیٹی اس جوڑ کننگاسس ہراٹی غٹ سیاسی جماعت آتا نمائندگی اوارئسک۔ وزیرکانود پارے کہ وزیراعظم اول پنجاب نا وزیراعلیٰ نا حیثیت اٹ و داسہ وزیراعظم نا عہدہ غا مرسا پیشن نا ملک آن ملوک آ ٹیکی تے توشہ خانہ ٹی جمع کرفے۔ اسہ سوج اسے نا ورندی ٹی اوپارے کہ عمران خان نا اسہ عدالت آن وارنٹ جاری مریک تو ایلوڑآن معطل مریک۔ اوپارے کہ داسہ وخت ءِ کہ غٹ ادارہ غاک بے کنڈ ہلوک و آئین و کانود نا رداٹ کاریم کیر۔ اوپارے کہ مسکوہی دور ءِ حکومت اٹ مہالو دزگیری مسکہ و ولدا انکوائری مسکہ، ساڑی آ دور ءِ حکومت اٹ اول انکوائری مریک ولدا دزگیری مریک۔ اسہ پین سوج اسے نا ورندی ٹی اوپارے کہ بیرہ کانود ءِ پرغوک آتا برخلاف کارروائی کننگ انگ ءِ و اوفتے دزگیر کننگ انگ ءِ۔ اوپارے کہ مقننہ عدلیہ و ایگزیکٹیو ریاست نا اہم تمبہ ءِ۔ اوپارے کہ جسٹس تصدق جیلانی، جسٹس ناصر الملک تون اوار ایلو جج آتا بھاز تعظیم ءِ کننگک۔ نواز شریف تینا باندات ءِ اللہ و الس آ اِلانے۔ اوپارے کہ غٹ سیاسی سرکڑدہ غاتے ادراک مرے کہ پولرائزیشن ملک اکن نسخان دہ ءِ و ملک انا شونداری کن نظریاتی اختلاف ءِ اسہ کنڈ تخسا کاریم کننگے۔ نن سیاسی سوگوی و میثاق زرگزران کن بایدے یکجا مرین۔

(اے پی پی)