تولنگ سیل کننگ کن بتنٹ، الس نا خذمت ءِ کیوہ، ولی کاکڑ

کوئٹہ : گورنر بلوچستان ملک عبدالولی خان کاکڑ پارینے کہ دا منصب آ تولسا داغدار مننگ خواپرہ و نئے سیل کننگ کن چپ تولوہ۔ بنجا وصوبہ نا نیام اٹ ساڑی مُری تے چٹفنگ کن پول انا کڑدار ءِ ادا کرسا اوفتے ٹی خڑکی اتیوہ تاکہ بلوچستان اٹ رہینگوک کل قومک بلوچستانی مرسا اونا شونداری ءِ پک کرسا پسماندگی ءِ ایسر کننگ کن کڑد ادا کننگ کیر‘ صوبہ ٹی امن ءِ اولیت ایتوہ‘ بلوچ پشتون ناچکر اٹ مسن تو شون ہلنگ کپنہ‘ کرن آتیان آباد سیٹلر آتے بریبری نا حق تروئی مریک‘ ہر حال اٹ الس نا خذمت ءِ کیوہ‘ گورنر ہاؤس نا پروٹوکول موکل تفک نہ تو شار اٹ سائیکل آ پیری کریٹہ۔ دا خیال آتا درشانی ءِ دوشنبے نا دے گورنر ہاؤس اٹ ایڈیٹر، بیوروچیف و سینئر صحافی تتون اوڑدہی ناوخت آ ہیت وگپ کرسا کرے‘ او پارے کہ میڈیا تون کنا رشتہ بھاز متکن ءِ‘ گورنر نا منصب الس نا امانت ءِ۔ میڈیا نا کمک آن بیدس آئینی زمواری تے پورو کننگ کپرہ‘ صوبہ ٹی امن ءِ اولیت ایتوہ‘ الس نا خذمت کننگ کن بسونٹ‘پنجا سال آن سیاسی کارندہ سے اُٹ‘ میڈیا ویل آتا نشاندہی ءِ کے تاکہ اوفتا ایسر کشنگ مرے۔ کنا درگہ الس کن دے ونن ملوک ءِ‘ گورنر نا واکداریک مست آن داسہ کم مسنو و گورنر ہاؤس نا امور تے چلیفنگ کن فنڈ اکن ہم وزیراعلیٰ ءِ پاوہ‘ بلوچستان اٹ کل قبیلہ غاک آباد ءُ کل انا نمائندہ اٹ‘ ای اسہ جماعت یا بلوچ پشتون نا گورنر افٹ بلکہ بلوچستان نا گورنر اٹ‘ صوبہ ٹی بلوچ پشتون نا ہچ ءُ ویل اس اف‘ منہ بندغ نا مننگ کیک‘ بلوچ پشتون نا چکر اٹ مسن تو حالیت آک پین خراب مریرہ۔ کل ءِ بلوچستانی جوڑ مرسا سوچوئی مریک۔ جامعہ غاتا وائس چانسلر تتون اوڑدہی کرینٹ‘ ای دا جاگہ نا سیٹلر آتے زیات شرف ایتوہ‘ ولے است ہسونی نا ہیت دادے کہ کرن آتیان آباد سیٹلر آتے بریبری نا حق اف بیرہ پشتون بلوچ نا آخا کل انا حق آتا رکھوک اٹ۔ بلوچستان و بنجا ٹی مُری تا چٹفنگ ءِ اولیت ایتوہ‘ نشان تننگ آباور کپرہ انتئے کہ ای سیاسی ورکر اسے اٹ۔ گورنر ہاؤس نا پروٹوکول موکل تفک نہ تو سائیکل آ شار اٹ پیری کریٹہ۔ 18 می ترمیم آن پد وائس چانسلر تے وزیراعلیٰ پن کیک ہراڑکن اسہ کمیٹی اس جوڑ ءِ ہرا وزیراعلیٰ کن مسہ پن نا سلاہ ایتک و وزیراعلیٰ ناکنڈآن اسہ پن اسے پن کننگ کن گورنر آ راہی کننگک ہرانا منظوری ءِ گورنر ایتک۔ صوبہ نا ویل آک زیات وسیلہ غاک کم ءُ‘ بے روزگاری داخس زیات ءِ کہ بلوچستان اسمبلی سیکرٹریٹ اٹ 220 اسامی تیکن 52 ہزار درخواست بسنے‘ ہرافتیان داخس اسامی کن بندغ آتے شارٹ لسٹ کننگ مشکل ءُ کاریم اسے‘ اوپارے کہ سیاسی جماعت آک تضاد آتے کم و ویل آتا ایسر ءِ کشنگ کیرہ‘ داڑکن گام گیج کننگ نا گرج ءِ۔ بلوچستان نا ویل آتیا سرجم نشست مننگ کیک۔ ای وزیراعظم میاں محمد شہباز شریف و بلوچستان نیشنل پارٹی نا سروک سردار اختر جان مینگل نا منتوار اٹ ہرافک کنے الس نا خذمت کننگ نا وارخواہی تسر۔ گورنر بلوچستان پارے کہ میڈیا حکمرانی نا امور تے ٹی راہشونی کے و بلوچستان نا مثبت امیج ءِ مون آ اتنگ کن کن سلوک مرے‘ تاکہ بلوچستان اٹ گچینی ءِ پک کننگ مرے۔ اسہ سوج اسے نا ورندی ٹی او پارے کہ بلوچستان نا جامعہ غاتے فنڈ تننگ کن گام گیج کینہ۔

(آن لائن)