نئی دہلی آن دوحہ غا ہنوک جہاز ءِ پاکستان اٹی ہلہلہ ئی لینڈنگ نا موکل

اسلام آباد: ایئر انڈیگو نا نئی دہلی آن دوحہ غا ہنوک آ جہاز انا پائلٹ نا ناجوڑ مسافر اسے نا سوب آن جہاز کراچی نا کنڈآ کننگ نا درخواست آ پاکستان سول ایوی ایشن اتھارٹی ہلہلہ ئی لینڈنگ و ڈائیورزن نا موکل تس۔ ترجمان سول ایوی ایشن اتھارٹی نا کنڈآن جاری بیان نا رداٹ نئی دہلی آن دوحہ غا ہنوک آ ایئر انڈیگو جہاز انا مسافر اسے نا حالیت خراب مننگ آ پاکستان سول ایوی ایشن کمامدارآک میڈیکل ایمرجنسی نا بنداو آ جہاز ءِ کراچی بالی پٹ آ ہلہلہ ئی لینڈنگ نا موکل تسنو۔ اوفک پاریر کہ ایئر انڈیگو نا جہاز دہلی آن دوحہ غا ہناکہ کہ پائلٹ ناجوڑ مسافر اسے نا سوب آن جہاز ءِ کراچی نا کنڈآ کننگ و ڈاکٹر و ایمبولینس فراوان کننگ نا درخواست کرے، پائلٹ نا کنڈآن پاننگاکہ ناجوڑ 60 سال انا نائیجیرین باتی اسے ہرانا ساہ و نبض بفننگ ءِ۔ پائلٹ نا درخواست نا جہاز وخت سولہ ناٹیکل مائلز آ پنجگور نا دے ٹک اٹی ئسک۔ ترجمان سول ایوی ایشن اتھارٹی پارے کہ جہاز کم و ود نن نا 12 بجہ ءُ 12 منٹ آ لینڈ کرے ہراڑاکل 163مسافر سوار ئسر۔ ترجمان پارے کہ ناجوڑی نا شدت نا سوب آن مسافر دراخ جوڑ مننگ کتو و سہب انا 4 بجہ ءُ 6 منٹ آ ایئر انڈیگو نا جہاز بانائیجیرین باتی نا میت ءِ تین تون درسا دوحہ کن راہی مس۔

(اے پی پی)